Bíó og sjónvarp

Rökkur fær verðlaun fyrir bestu kvikmyndatöku

Stefán Árni Pálsson skrifar
Rökkur verður frumsýnd á Íslandi þann 27. október.
Rökkur verður frumsýnd á Íslandi þann 27. október.
Íslenski spennutryllirinn Rökkur hefur hlotið verðlaun fyrir bestu kvikmyndatöku á kvikmyndahátíðinni California Independent Film Festival, sem haldin er um þessar mundir í tuttugasta skiptið í San Francisco.

Með stjórn kvikmyndatöku fór hinn bandaríski John Wakayama Carey. Fyrr í ár hlaut Rökkur verðlaun fyrir listrænt afrek á Outfest kvikmyndahátíðinni í Los Angeles. 

Rökkur verður frumsýnd á Íslandi þann 27. október næstkomandi. 

Rökkur var heimsfrumsýnd fyrr í ár á kvikmyndahátíðinni í Gautaborg sem lokamynd hátíðarinnar, og hefur síðan þá verið valin inn á yfir tuttugu alþjóðlegar hátíðir. Á meðal næstu stoppa eru Fantastic Fest í Austin, Texas, sem er ein stærsta hátíð heims sem leggur áherslu á „genre“ myndir (sbr. hrollvekjur, vísindaskáldsögur, fantasíur o.s.frv.) og BFI London Film Festival, sem er stærsta kvikmyndahátíð Bretlands. 

Ómar Hauksson hannaði plakat myndarinnar.
Rökkur segir frá Gunnari, sem fær símhringingu um miðja nótt frá fyrrverandi kærastanum sínum, Einari. Hann er í miklu uppnámi og Gunnar er hæddur um að hann muni fara sér að voða og keyrir til hans upp á Snæfellsnes þar sem hann hefur hreiðrað um sig í afskekktum bústað.

Strákarnir gera upp samband sitt í bústaðnum en fljótlega kemst Gunnar að því að vandamálið er stærra en hann hefði nokkurn tímann getað ímyndað sér og eru þeir ekki einir.

Björn Stefánsson, Sigurður Þór Óskarsson og Aðalbjörg Árnadóttir fara með aðalhlutverk í myndinni, ásamt Guðmundi Ólafssyni, Jóhanni Kristófer Stefánssyni og Önnu Evu Steindórsdóttur.

Búi Baldvinsson, Baldvin Kári Sveinbjörnsson og Erlingur Óttar Thoroddsen framleiddu, en Erlingur skrifaði einnig handritið og leikstýrði myndinni. 

Dreifingaraðilinn Breaking Glass Pictures hefur tekið að sér dreifingu á myndinni í Bandaríkjunum og mun hún koma út þar í kvikmyndahúsum og á stafrænum miðlum í lok ársins.


Tengdar fréttir

Góður jarðvegur fyrir hrylling á Íslandi

Það er furðulegt að Íslendingar skuli ekki framleiða meira af hrollvekjum, að mati ungs leikstjóra sem frumsýnir um helgina íslensk/amerísku hryllingsmyndina Child Eater. Myndin er framleidd í Bandaríkjunum en innblásin af íslenskri sagnahefð

Hryllingsmynd Erlings vekur athygli

„Ég hef verið aðdáandi hryllingsmynda síðan ég var krakki,“ segir Erlingur Óttar Thoroddsen meistaranemi í kvikmyndaleikstjórn við Columbia-háskóla í New York. Stuttmynd hans Child Eater hefur hlotið nokkra athygli vestra þrátt fyrir að hafa einungis verið sýnd einu sinni.

Sturlað ár hjá Bjössa í Mínus

Björn Stefánsson, eða Bjössi í Mínus eins og margir þekkja hann, venti kvæði sínu í kross fyrir nokkrum árum, flutti til Danmerkur með ástinni sinni, fór í leiklistarskóla og lætur nú að sér kveða í íslenskum leikhúsum og kvikmyndum.

Erlingur mun leikstýra nýrri kvikmynd byggðri á verki Yrsu

Síðasta kvikmynd sem byggð var á verkum Yrsu var hrollvekjan Ég man þig og var henni vel tekið í íslenskum kvikmyndahúsum. Nýjasta myndin mun einnig byggja á yfirskilvitlegum grunni og fékk bókin góða dóma árið 2012 þegar hún kom út.






Fleiri fréttir

Sjá meira


×