Innlent

Alfreð segir skelfilegt að höfuðstöðvar OR hafi verið látnar grotna niður

Sigurður Mikael Jónsson skrifar
Alfreð Þorsteinsson, fyrrverandi borgarfulltrúi og stjórnarformaður OR til ársins 2006.
Alfreð Þorsteinsson, fyrrverandi borgarfulltrúi og stjórnarformaður OR til ársins 2006. vísir/valli

„Það stóð ekkert annað til en að byggja bara mjög gott hús,“ segir Alfreð Þorsteinsson, fyrrverandi stjórnarformaður Orkuveitu Reykjavíkur (OR), um ástandið á höfuðstöðvum fyrirtækisins í dag. Hið hripleka vesturhús fyrirtækisins er ónothæft og heilsuspillandi vegna rakaskemmda og myglu og ljóst er að það mun kosta á annan milljarð að gera nauðsynlegar úrbætur líkt og fjallað hefur verið um.

Alfreð hefur í gegnum tíðina verið einhvers konar samnefnari fyrir hinar umdeildu höfuðstöðvar enda leiddi hann sameiningu Orkuveitunnar í eitt fyrirtæki og byggingu höfuðstöðvanna sem stjórnarformaður um árabil. Alfreð gegndi stöðunni til ársins 2006.

„Mér finnst athyglisvert að menn rýni ekki betur í það, þegar ljóst er fyrir mörgum árum að það var einhver galli þarna, að menn skuli ekki hafa grafist almennilega fyrir um það og húsið látið grotna svona niður. Það er auðvitað alveg skelfilegt.“

Vísar Alfreð þarna í ummæli Guðmundar Þóroddssonar, fyrrverandi forstjóra OR, sem sagði í samtali við RÚV að rekja mætti ástand hússins til skorts á viðhaldi vegna sparnaðar­aðgerða eftir hrun. Guðmundur fullyrti að menn hefðu vitað að húsið lak árið 2009 og þá hefði verið farið strax í að þétta það að einhverju leyti. En ekkert fé hafi verið til, til að halda því verki áfram.

Alfreð segir líkt og Guðmundur að aldrei hafi staðið annað til en að byggja gott hús. Farið hafi verið eftir öllum reglum, allt boðið út og landslið verkfræðinga og hönnuða fengist við það. Alfreð kveðst að öðru leyti ekki ætla að tjá sig frekar um málið að svo stöddu.

Kjartan Magnússon, borgarfulltrúi Sjálfstæðisflokksins, mun á næsta borgarstjórnarfundi leggja til að fram fari opinber rannsókn á tjóni höfuðstöðvanna. Vill Kjartan að rannsakaðir verði allir þættir, allt frá aðdraganda til byggingar, framúrkeyrslu í kostnaði og viðhalds frá upphafi.

„Mikilvægt er að fjallað verði um pólitíska ábyrgð í málinu, til dæmis með hvaða hætti ákvarðanir voru teknar um bygginguna á sínum tíma og hvernig staðið var að framkvæmdum. Ljóst er að sú ábyrgð liggur hjá þáverandi borgarstjórnarmeirihluta Samfylkingar, Framsóknarflokks og Vinstri grænna. Eini borgarfulltrúinn úr þeim meirihluta sem enn situr í borgarstjórn er Dagur B. Eggertsson borgarstjóri. Meðan á byggingu Orkuveituhússins stóð gekk Dagur fram fyrir skjöldu til að verja þau vinnubrögð, sem áttu sér stað hjá Orkuveitunni, og hélt því meðal annars fram að skuldir fyrirtækisins væru ,,einhverjar eftirsóttustu skuldir landsins“,“ segir Kjartan. 


Tengdar fréttir

Orkuveitan útvegaði útveggina

Forstjóri aðalverktaka við byggingu höfuðstöðva OR segir Orkuveituna bera ábyrgð á hripleku útveggjakerfi höfuðstöðvanna. Hann segist ekki búast við eftirmálum, þó forsvarsmenn OR skoði lagalega stöðu sína.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.