Veiði

Haustbragur á veiðitölum vikunnar

Karl Lúðvíksson skrifar

Það er komin haustbragur á veiðitölurnar og það styttist í að fyrstu lokatölurnar berist af bökkum ánna.

Rigningin í síðustu viku gerði ánum gott og kom tökunni aðeins í gang aftur.  Holl sem lauk veiðum í Langá á Mýrum í gær tók til að mynda 45 laxa í afslappaðri veiði en áin er komin í frábært veiðivatn og loksins hætt að vera glær eins og síðustu vikur.  Síðasta vika þar á bæ skilaði 77 löxum á land en vikan sem telur núna er komin í 60 laxa svo það stefnir í að Langá fari eitthvað yfir veiðina í fyrra.  Það sama má segja um aðrar ár á vesturlandi en Þverá/Kjarrá, Grímsá, Haffjarðaá, Laxá í Kjós og Laxá í Leirársveit eru ýmist komnar yfir eða fara nokkuð örugglega yfir heildarveiðina í fyrra.

Ytri Rangá er ennþá efst á listanum en það hefur aðeins dregið úr veiðinni þar sem er einkennilegt að segja þegar það veiðast ennþá hátt í 400 laxar í hverri viku.  Það er nokkuð ljóst að hún kemur til með að vera á toppnum þetta sumarið því það er nóg eftir af veiðitímanum og mikið af laxi í ánni.  Topp 10 listinn yfir aflahæstu árnar er hér að neðan en listann í heild sinni má finna á www.angling.is

Ytri-Rangá 4.583 lax­ar - viku­veiði 364 lax­ar
Miðfjarðará 2.937 lax­ar - viku­veiði 269 lax­ar
Þverá/​Kjar­rá 1.890 lax­ar - viku­veiði 113 lax­ar
Eystri Rangá 1.773 lax­ar – viku­veiði 88 lax­ar
Blanda 1.390 lax­ar - viku­veiði 59 lax­ar
Norðurá 1.442 lax­ar - viku­veiði 27 lax­ar
Langá á Mýr­um 1.314 lax­ar - viku­veiðin 77 lax­ar
Haffjarðará 1.085 lax­ar – viku­veiði 55 lax­ar
Grímsá í Borg­ar­f­irði 968 lax­ar – viku­veiði 50 lax­a
Selá í Vopnafirði 880 lax­ar – viku­veiði 70 lax­ar



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira