Viðskipti erlent

Bjóða farþegum að stinga sér til sunds

Stefán Ó. Jónsson skrifar
Svona mun sundlaugin koma til með að líta út.
Svona mun sundlaugin koma til með að líta út. Punta Cana

Farþegar sem eiga leið um alþjóðaflugvöllinn Punta Cana í Dóminíkanska lýðveldinu á næstunni ættu að hafa sundfötin í handfarangrinum.

Frá og með desember næstkomandi geta gestir nýrrar viðhafnarsetustofu flugvallarins stungið sér til sunds meðan horft er yfir flugbrautirnar. Nýja setustofan verður sú þriðja á vellinum en þær sem fyrir eru eru sagðar öllu hefðbundnari.

Stærð laugarinnar, hvað kostar að dýfa sér í hana og önnur slík smáatriði liggja ekki fyrir að svo stöddu en kynningar er að vænta frá fyrirtækinu sem rekur völlinn.

Þegar Punta Cana var vígður árið 1983 varð hann fyrsti einkarekni flugvöllurinn í heiminum. Hann hefur fært verulega út kvíarnar á síðustu árum þökk sé auknum ferðamannastraumi til Dóminíkanska lýðveldisins.

Flugvöllurinn í Punta Cana verður þó ekki sá fyrsti til að búa yfir sundlaug. Changi flugvöllurinn í Singapúr, sem valinn hefur verið besti flugvöllur heims undanfarin 5 ár, skartar sundlaug á þaki flugstöðvar 1. Þar kostar um 1400 íslenskar krónur að fara í laugina en þar má jafnframt finna heita potta, sundlaugarbar og sturtur.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira