Golf

Ólafía Þórunn ein í fjórða sæti í Indianapolis

Ólafía Þórunn.
Ólafía Þórunn. Vísir/Getty

Ólafía Þórunn Kristinsdóttir, kylfingur úr GR, lauk leik í fjórða sæti á Indy Women in Tech-mótsins í Indianapolis sem lauk rétt í þessu með sigri Lexi Thompson en örn Ólafíu á lokaholunni kom henni úr tíunda sæti í það fjórða.

Fékk hún þrjá fugla, einn örn og einn skolla í dag ásamt þrettán pörum á lokadegi mótsins en hún skaust úr 7-12. sæti í fjórða sætið með góðum lokaholum.

Mun þetta eflaust efla sjálstraust hennar fyrir Evian-mótið um næstu helgi, síðasta stórmóts ársins á LPGA-mótaröðinni en hún hefur þegar tryggt sér þátttökurétt.

Lexi Thompson bar sigur úr býtum í Indianapolis um helgina eftir baráttu við Lydia Ko en af efstu tíu kylfingum lék aðeins Minjee Lee sem hafnaði í 3. sæti betur en Ólafía á fimm höggum undir pari.

Ekki er komið á hreint hversu mikið þessi sigur færir Ólafíu í verðlaunafé en ef miðað er við önnur mót á mótaröðinni þar sem verðlaunapotturinn var sá sami var Ólafía að tryggja sér á bilinu 80-100 þúsund dollara eða rúmlega tíu milljónir íslenskra króna.

Það ætti að hjálpa henni all verulega að halda sæti sínu á LPGA-mótaröðinni en fram að þessu var hún búinn að vinna 72.090 dollara. Var hún í 106. á peningalistanum en hún ætti að lyfta sér verulega upp listann með þessu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira