Bíó og sjónvarp

Magnolia tryggir sér dreifingarrétt á Undir trénu

Margrét Helga Erlingsdóttir skrifar
Sigurður Sigurjónsson, Steindi og Edda Björgvins á rauða dreglinum í Feneyjum.
Sigurður Sigurjónsson, Steindi og Edda Björgvins á rauða dreglinum í Feneyjum. vísir/getty

Bandaríska fyrirtækið Magnolia tryggði sér dreifingarrétt á kvikmyndinni Undir trénu sem frumsýnd var á dögunum. Hafsteinn Gunnar Sigurðsson skrifaði handritið að myndinni og leikstýrði henni.

Magnolia er með stærstu dreifingarfyrirtækjum heims um þessar mundir en það hefur meðal annars annast dreifingu kvikmynda þeirra Thomasar Vinterberg, Lars von Trier og Lukasar Moodysson.

„Viðfangsefni myndarinnar virðist ná til fólks utan landsteinanna og viðbrögðin frá því að myndin var frumsýnd hafa svo sannarlega undirstrikað það. Það eiga allir nágranna og forræðisdeilur grassera því miður víða. Að setja þessar sorglegu sögur í grátbroslegan búning virðist hafa heppnast vel og eiga skírskotun víða.“ segir Hafsteinn Gunnar Sigurðsson, leikstjóri myndarinnar.

Grímar Jónsson, framleiðandi myndarinnar, segir að það sé virkilega erfitt fyrir kvikmyndir sem ekki séu leiknar á ensku að fá almenna dreifingu í amerískum kvikmyndahúsum. Aðstandendur kvikmyndarinnar eru því hæstánægðir með samstarfið við Magnoliu.

Undir trénu var nýverið heimsfrumsýnd á kvikmyndahátíðinni í Feneyjum og myndin verður einnig sýnd á kvikmyndahátíð í Toronto. Myndin verður sýnd á markaðshluta hátíðarinnar en auk þess í flokknum „Contemporary World Cinema.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira