Fótbolti

Stjarnan skoraði sjö í fyrri hálfleik

Ingvi Þór Sæmundsson skrifar
Donna Henry skoraði tvívegis gegn færeysku meisturunum.
Donna Henry skoraði tvívegis gegn færeysku meisturunum. vísir/andri marinó
Stjarnan rúllaði yfir KÍ Klaksvík frá Færeyjum, 9-0, í riðli 7 í forkeppni Meistaradeildar Evrópu kvenna í dag. Riðilinn er leikinn í Osijek í Króatíu.

Eins og tölurnar gefa til kynna var þetta auðvelt dagsverk hjá Íslandsmeisturunum.

Agla María Albertsdóttir kom Stjörnunni yfir strax á 8. mínútu. Staðan var 1-0 fram á 31. mínútu þegar Garðbæingar settu í fluggírinn og skoruðu sex mörk á 13 mínútum. Ótrúlegur kafli hjá Íslandsmeisturunum sem leiddu 7-0 í hálfleik.

Stjörnukonur tóku fótinn af bensíngjöfinni í seinni hálfleiknum og létu tvö mörk í viðbót nægja. Lokatölur 9-0, Stjörnunni í vil.

Guðmunda Brynja Óladóttir og Donna Kay Henry skoruðu tvö mörk hvor fyrir Stjörnuna. Agla María, Katrín Ásbjörnsdóttir, Bryndís Björnsdóttir og Lára Kristín Pedersen skoruðu eitt mark hver og þá skoraði leikmaður KÍ Klaksvík sjálfsmark.

Stjarnan leikur næst gegn Istatov frá Makedóníu á föstudag og að síðustu gegn Osijek á mánudag.




Fleiri fréttir

Sjá meira


×