Erlent

Stofnandi Wikileaks sá samsæri í sólmyrkvagleraugum

Kjartan Kjartansson skrifar
Julian Assange reyndi að segja fylgjendum sínum á Twitter að það væri engin hætta fólgin í að horfa á almyrkva með berum augum.
Julian Assange reyndi að segja fylgjendum sínum á Twitter að það væri engin hætta fólgin í að horfa á almyrkva með berum augum. Vísir/samsett
Þvert á ráðleggingar lækna og vísindamanna tilkynnti Julian Assange, stofnandi Wikileaks, fylgjendum sínum á Twitter að fólki væri óhætt að horfa á almyrkva á sólu með berum augum. Taldi hann viðvaranir um annað runnar undan rifjum hagsmunaaðila.

Assange hefur verið furðuleg fígúra í heimsmálunum undanfarin ár. Hann hefst enn við í sendiráði Ekvador í London til að komast undan handtökuskipun breskra yfirvalda fyrir að gefa sig ekki fram við dómstól árið 2012. Hann hefur við og við gefið frá sér yfirlýsingar sem virðast benda til þess að hann sé hallur undir Donald Trump Bandaríkjaforseta og rússnesk stjórnvöld.

Bandaríska leyniþjónustan segir að uppljóstrunarvefur hans, Wikileaks, hafi tekið við stolnum gögnum úr póstþjónum Demókrataflokksins í Bandaríkjunum sem rússneskir tölvuþrjótar eru sakaðir um að hafa komið brotist inn í.

Í röð tísta á mánudag, daginn sem almyrkvi var sjáanlegur frá stórum hluta Bandaríkjanna, ákvað Assange að sigla gegn straumi viðurkenndra staðreynda og fullyrti að því fylgdi engin hætta að horfa á almyrkvann. Það væri aðeins fyrir og eftir að tunglið hyldi algerlega sólina sem hætta væri á ferðum.

Sérfræðingar og fjölmiðlar höfðu brýnt fyrir almenningi að horfa ekki á sólmyrkvann með berum augum og mældu með sérstökum sólmyrkvagleraugum sem sía út skaðlega sólargeisla. Á vefsíðu NASA kom fram að jafnvel þó að tunglið skyggði á 99% sólarinnar væri hætta á verulegum augnskemmdum horfði fólk á hana með berum augum.

Ung stúlka horfir á deildarmyrkva sem var sjáanlegur frá New York á mánudag. Illa hefði farið fyrir augum hennar hefði hún reynt að stara á myrkvann með berum augum.Vísir/AFP
Almyrkvi stendur stutt og flestir sjá aðeins deildarmyrkva

Fullyrðing Assange er í sjálfu sér ekki röng en hún hunsar lykilþætti sem varða öryggi þess að fylgja með sólmyrkvum.

Rétt er að tunglið lokar á sterka geisla sólarinnar einmitt á meðan almyrkvinn er í hámarki. Nær ómögulegt er hins vegar að segja með fullri vissu nákvæmlega hversu lengi það augnablik stendur yfir á hverjum stað. Þar sem almyrkvinn stóð sem lengst yfir varði hann í um tvær og hálfa mínútu.

Eins og vefsíðan Gizmodo bendir einnig á sér afgerandi meirihluti fólks heldur aldrei fullan almyrkva heldur aðeins deildarmyrkva þar sem tunglið skyggir aðeins á hluta skífu sólarinnar. Það var tilfellið víðsvegar um Bandaríkin utan slóðar almyrkvans sjálfs á mánudag. Þannig voru aðeins 72% sólarinnar hulin í New York til dæmis.

Asssange virtist hins vegar sannfærður um að verið væri að hafa bandarískan almenning að leiksoppum.

„Þú horfir í burtu þegar þú sérð hann enda. Augun færa sig líka til að verja sig. Móðursýkinni virðist líka viðhaldið af hagnaði gleraugnafyrirtækja,“ tísti Assange.


Tengdar fréttir

Beðið í ofvæni eftir almyrkva

Þetta er í fyrsta skipti síðan 1918 sem tunglið gengur í veg fyrir sólu og veldur almyrkva af þessu tagi þvert yfir Bandaríkin.

Sævar Helgi: Orð geta ekki lýst almyrkva

Ritstjóri Stjörnufræðivefsins var mættur til Bandaríkjanna til að fylgjast með almyrkva á sólu í gær. Hann skortir orð til að lýsa upplifuninni.

Milljónir upplifðu almyrkva á sólu

Almyrkvinn sást fyrst frá Oregon-ríki klukkan korter yfir tíu að staðartíma, eða korter yfir fimm að íslenskum tíma. Lauk honum í Suður-Karólínu um klukkan korter í sjö.




Fleiri fréttir

Sjá meira


×