Innlent

Ráðleggur ferðamönnum að sleppa Bláa lóninu og fara frekar í sund

Sylvía Rut Sigfúsdóttir skrifar
Rick Steves ráðleggur ferðamönnum að sleppa því að heimsækja Bláa lónið og fara frekar í eina af sundlaugum landsins.
Rick Steves ráðleggur ferðamönnum að sleppa því að heimsækja Bláa lónið og fara frekar í eina af sundlaugum landsins. Vísir

Rick Steves ferðabókahöfundur ráðleggur ferðamönnum að sleppa því alfarið að fara í Bláa Lónið ef markmiðið er að eyða litlu á ferðalagi sínu hér á landi. Þetta kemur fram í grein sem hann birti á heimasíðu sinni en Steves er höfundur bókarinnar Rick Steves Iceland sem kemur út í mars á næsta ári. Í greininni gefur hann ferðamönnum 10 ráð til þess að spara á Íslandi, sem hann lýsir sem einum vinsælasta en dýrasta áfangastað Evrópu.

Steves mælir með því að fólk fari frekar í sundlaugar landsins heldur en Bláa lónið og bendir á að þannig sé hægt að spara háar fjárhæðir. Hann hvetur fólk líka til þess að kaupa sér afsláttarkort ef það ætlar í margar laugar á ferð sinni um Ísland. Þess má geta að hægt er að bóka aðgang að Bláa Lóninu fyrir 6.100 til 53.000 krónur, en verðið fer eftir tímasetningu heimsóknarinnar og því sem er innifalið. Oftast þarf að bóka heimsóknina með nokkurra daga fyrirvara. 

Á lista Steves er einnig mælt með því að íhuga að leigja bílaleigubíl og íbúð í gegnum Airbnb. Hann hvetur fólk til þess að leigja herbergi sem deilir baðherbergi með öðrum, því þau séu mun ódýrari en herbergi með einkabaðherbergi á gistiheimilum.

Þegar kemur að mat þá mælir Steves með því að ferðamenn borði stóra máltíð í hádeginu því það sé á hagstæðara verði. Á kvöldin væri þá sniðugt að kaupa ódýran skyndibita og nefnir hann þar pitsustaði, pylsuvagna og veitingastað IKEA.

Steves hvetur fólk til þess að versla áfengi í fríhöfninni í Leifstöð og í Vínbúðinni. Ef drekka eigi á veitingastað eða bar sé sniðugt að fylgjast með því hvenær sé hægt að fá drykki á „Happy hour“ tilboðum. Einnig bendir hann fólki að vera mjög meðvitað um það hvað sé innifalið á veitingastöðum eins og vatn, kaffi og fleira. Tekur þar fram sérstaklega að ekki sé gerð krafa um þjórfé.

Ferðamönnum er ráðlagt að vanda valið þegar kemur að heimsóknum á söfn og útsýnisferðum enda sé verðmiðinn oft mjög hár.

„Þegar þú ákveður að eyða, veldu upplifun sem þú munt aldrei gleyma.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.