Viðskipti innlent

Búast við minni hækkunum á húsnæði

Fasteignaverð í Breiðholti hefur hækkað töluvert undanfarið ár. Nú er búist við að það taki að hægja á hækkunum.
Fasteignaverð í Breiðholti hefur hækkað töluvert undanfarið ár. Nú er búist við að það taki að hægja á hækkunum. vísir/andri marinó

Eftir miklar húsnæðisverðshækkanir að undanförnu eru teikn á lofti um að farið sé að hægja á húsnæðismarkaðnum. Þetta kemur fram í uppfærðri hagvaxtarspá greiningardeildar Arion banka. Þar kemur fram að auglýstum fasteignum hefur fjölgað, ásett fermetraverð farið lækkandi og fjölbýli á höfuðborgarsvæðinu lækkað í verði á milli mánaða í júní, í fyrsta skipti frá 2015.

„Við gerum ráð fyrir að hægja taki verulega á húsnæðisverðshækkunum á komandi misserum, enda hefur húsnæðisverð hækkað talsvert umfram laun og ráðstöfunartekjur að undanförnu, sem og að útlit er fyrir mikilli framboðsaukningu,“ segir í spá greiningadeildarinnar.

Gert er ráð fyrir fyrir kröftugum hagvexti í ár, eða 5,3%, en að hægja taki á vextinum þegar fram í sækir. Einkaneyslan verður ein helsta driffjöður hagvaxtarins, studd áfram af litlu atvinnuleysi og kaupmáttaraukningu og þjónustuútflutningi.

Greiningardeildin gerir ráð fyrir að verðbólgan taki að stíga á næsta ári og fari hæst í 3,2% í ársbyrjun 2019. Gert er ráð fyrir minni verðbólgu en áður var talið.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira