Íslenski boltinn

Þrumuskot Guðnýjar þenja út netmöskvana í Pepsi-deildinni

Óskar Ófeigur Jónsson skrifar
Guðný Árnadóttir fagnar sigurmarkinu sínu með hinum FH-stelpunum á Kaplakrikavellinum í gær.
Guðný Árnadóttir fagnar sigurmarkinu sínu með hinum FH-stelpunum á Kaplakrikavellinum í gær. Mynd/S2 Sport

FH-ingurinn Guðný Árnadóttir er búin að skora 33 prósent marka síns liðs í Pepsi-deild kvenna í sumar en þau hafa öll komið fyrir utan teig og öll beint úr föstum leikatriðum.

Guðný tryggði FH 1-0 sigur á Haukum í gær með þrumuskoti beint úr aukaspyrnu af um 40 metra færi.

Þetta var fjórða mark hennar á tímabilinu en hún spilar í miðri vörn FH-liðsins. Guðný er líka nýkomin á bílprófsaldurinn en hún hélt upp á sautján ára afmælið sitt fyrir nokkrum dögum.

Guðný hefur skorað þrjú mörk beint úr aukaspyrnu í Pepsi-deildinni í sumar og eitt mark beint úr hornspyrnu.

Guðný skoraði líka beint úr aukaspyrnu framhjá Tori Ornela í marki Hauka í fyrri leik liðanna en sú aukaspyrna var af um 25 metra færi.

Aukaspyrnumark Guðnýjar á móti KR kom af 18 metra færi og þá skoraði hún beint úr hornspyrnu í Grindavík.

FH-liðið hefur unnið fimm leiki í Pepsi-deildinni í sumar og Guðný hefur skorað í fjórum þeirra. Hún skoraði ekki fyrsta sigrinum á móti Fylki í maí en hefur skorað í öllum sigurleikjum Hafnarfjarðarliðsins síðan þá.

Nú verður athyglisvert hvort þrumuskot Guðnýjar haldi áfram að þenja út netmöskvanna í Pepsi-deildinni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira