Lífið

Kringlan fagnar 30 árum

Haraldur Guðmundsson skrifar
Pálmi Jónsson, stofnandi Hagkaupa, opnaði Kringluna með því að klippa á borða. Ragnar Atli Guðmundsson, sem hafði yfirumsjón með byggingunni, aðstoðaði hann.
Pálmi Jónsson, stofnandi Hagkaupa, opnaði Kringluna með því að klippa á borða. Ragnar Atli Guðmundsson, sem hafði yfirumsjón með byggingunni, aðstoðaði hann. Mynd/LjósmyndasafnReykjavíkur/Brynjar Gauti Sveinsson

Klukkan tíu að morgni þann 13. ágúst 1987 klippti Pálmi Jónsson, oftast kenndur við Hagkaup, á borða í Kringlunni og opnaði þar með verslanamiðstöðina að viðstöddu fjölmenni. Byggingin fagnar því 30 ára afmæli á morgun, sunnudag.

Landsmenn fylgdust náið með uppbyggingu Kringlunnar enda var framkvæmdin fordæmalaus. Með henni tók verslun hér á landi stakkaskiptum og verslunarrými í borginni jókst um tæp tíu prósent á einu bretti.

Verslanamiðstöðin var byggð að erlendri fyrirmynd, með aðstoð breskra ráðgjafa, og hófst verkið af krafti sumarið 1985. Pálmi var aðalhvatamaður þess og hafði unnið að hugmynd sinni frá árinu 1980.

Alls voru 68 verslanir í Kringlunni á opnunardeginum, átta veitingastaðir, og byggingin þá um 28 þúsund fermetrar að stærð. Hún var þá næststærsta hús landsins, á eftir kerskálum álversins í Straumsvík. Verkið var svo stórt að umfangi að allar lánastofnanir landsins komu að því og innlendar steypustöðvar önnuðu ekki eftirspurninni. Rúmlega 5.700 tilnefningar bárust í nafnasamkeppni um heiti nýju verslunarmiðstöðvarinnar, eins og kemur fram í bók Sigurðar Más Jónssonar, Kringlan í aldarfjórðung. Miðgarður, Kringlan, Kauphöllin, Hagbær og Pálmalundur, fengu þá flestar tilnefningar.

Fjórum árum síðar var Borgarkringlan opnuð en hún stóð á milli Kringlunnar og Borgarleikhússins. Rekstur verslana þar gekk misjafnlega og árið 1996 voru verslanamiðstöðvarnar tvær sameinaðar með tengigangi. Þremur árum síðar var svo ráðist í stækkun með nýrri viðbyggingu sem tengir saman Kringluna, Borgarkringluna og Borgarleikhúsið. Stækkunin var liður í svari Kringlunnar við nýju verslanamiðstöðinni Smáralind í Kópavogi sem átti að opna skömmu eftir aldamótin.

Af þeim 68 verslunum eða veitingahúsum sem voru opnuð í Kringlunni í ágúst 1987 eru átján úr þeim hópi enn í húsinu. Þar á meðal eru gleraugnaverslunin Augað, skóbúðin Bossanova, Herragarðurinn, Byggt og búið og Heilsuhúsið.

Kringlan er í dag um 53 þúsund fermetrar og hefur því nánast tvöfaldast að stærð. Alls eru verslanir þar nú 119 talsins og veitingastaðirnir sextán. Afmælishátíð Kringlunnar verður haldin í október eða þegar framkvæmdum vegna opnunar sænsku fataverslunarinnar H&M, og breytingum á verslun Hagkaupa á jarðhæð, verður lokið.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira