Golf

Matsuyama og Kisner deila toppsætinu á PGA-meistaramótinu

Kristinn Páll Teitsson skrifar
Matsuyama horfir á eftir upphafshöggi sínu í gær
Matsuyama horfir á eftir upphafshöggi sínu í gær Vísir/getty

Japanski kylfingurinn Hideki Matsuyama kom í hús á sjö höggum undir pari á öðrum degi PGA-meistaramótsins þrátt fyrir erfiðar aðstæður og deilir toppsætinu með Kevin Kisner eftir tvo hringi á þessu síðasta risamóti ársins.

Var leik stöðvað í tæplega tvo tíma vegna veðurs á Quail Hollow-vellinum í Charlotte-borg í Norður Karólínu en það eiga enn nokkrir kylfingar eftir að ljúka við annan hringinn, þar á meðal Chris Shroud sem er þremur höggum á eftir efstu kylfingum.

Matsuyama sem er í þriðja sæti á heimslistanum í golfi átti besta hring gærdagsins en hann náði að jafna við Kisner á toppnum þrátt fyrir að heimamaðurinn kæmi í hús á fjórum höggum undir pari.

Hefur hvorugur þeirra fagnað sigri á einu af fjórum stórmótunum en Matsuyama komst næst því á dögunum er hann hafnaði í öðru sæti á Opna bandaríska meistaramótinu.

Jason Day sem fagnaði sigri á þessu móti árið 2015 er ekki langt undan á sex höggum undir pari en Jordan Spieth sem vantar aðeins þennan titil í safnið yfir risatitlana fjóra náði sér ekki á strik og er ellefu höggum eftir efstu kylfingum.

Það var ekki aðeins Spieth sem náði sér ekki á strik í gær en Phil Mickelson komst ekki í gegn um niðurskurðinn á öðru stórmótinu í röð og er þetta í fyrsta sinn í 22 ár sem hann missir af niðurskurðinum á PGA-meistaramótinu.

Þá komust kylfingar á borð við Sergio Garcia sem fagnaði sigri á Masters-mótinu, Justin Rose, Bubba Watson og fleiri góðir ekki í gegnum niðurskurðinn.

Sýnt verður frá þriðja degi PGA-meistaramótsins á Golfstöðinni en útsending hefst klukkan 18.00.




Fleiri fréttir

Sjá meira