Enski boltinn

Ian Wright: Framkoma Costa er svívirðileg

Ingvi Þór Sæmundsson skrifar
Diego Costa hefur væntanlega leikið sinn síðasta leik fyrir Chelsea.
Diego Costa hefur væntanlega leikið sinn síðasta leik fyrir Chelsea. vísir/getty
Ian Wright, fyrrverandi framherji Arsenal og enska landsliðsins, segir að framkoma Diegos Costa, framherja Chelsea, sé svívirðileg.

Antonio Conte, knattspyrnustjóri Chelsea, tjáði Costa í júní að hann ætti sér enga framtíð hjá félaginu. Þrátt fyrir það er Costa enn á mála hjá Englandsmeisturunum.

Costa hefur verið sagt að koma aftur til Chelsea og æfa með varaliðinu. Hann heldur hins vegar kyrru fyrir í Brasilíu og virðist ekkert vera á leiðinni aftur til Englands, jafnvel þótt Chelsea sekti hann fyrir fjarveruna.

Ian Wright skilur hvorki upp né niður í Diego Costa né Chelsea.vísir/getty
„Ég skil ekki hvernig leikmenn komast upp með svona framkomu. Þetta er svívirðilegt,“ sagði Wright við BBC.

Wright skilur hins vegar ekki af hverju Chelsea vill losna við Costa sem var markahæsti leikmaður liðsins á síðasta tímabili.

„Eitthvað hefur gerst. Ég skil ekki af hverju þeir vilja losna við mann sem skorar pottþétt 20 mörk. Ég næ því ekki,“ sagði Wright.

Costa vill ólmur fara aftur til Atlético Madrid sem hann lék með áður en hann fór til Chelsea. Vandinn er hins vegar sá að Atlético er í félagaskiptabanni og má ekki kaupa leikmenn fyrr en eftir áramót.


Tengdar fréttir




Fleiri fréttir

Sjá meira


×