Erlent

Trump sagði óeirðirnar í Virginíu báðum að kenna á stórfurðulegum blaðamannafundi

Kristín Ólafsdóttir skrifar
Donald Trump Bandaríkjaforseti á blaðamannafundi í Trump-turni í New York-borg í dag.
Donald Trump Bandaríkjaforseti á blaðamannafundi í Trump-turni í New York-borg í dag. Vísir/AFP

Donald Trump Bandaríkjaforseti kenndi báðum fylkingum, þjóðernissinum og gagnmótmælendum, um óeirðirnar í Virginíu-ríki um helgina. Átök helgarinnar urðu helsta umræðuefni furðulegs blaðamannafundar sem haldinn var í anddyri Trump-turns í New York-borg í dag.

Fundurinn, sem hófst á yfirlýsingu um „skipulag“ að því er fram kemur í frétt CNN, snerist fljótt upp í umræður um átök þjóðernissinna og gagnmótmælenda í Charlottesville um helgina. Ekki var búist við því að Trump myndi svara spurningum á fundinum, sem hann svo gerði, en úr varð stórfurðuleg atburðarás.

Trump var spurður hvort hann teldi stjórnmálahreyfinguna „hitt hægrið“ (e. alt-right), sem þjóðernissinnarnir í Charlottesville hafa gjarnan verið kenndir við, fyndi til sektarkenndar vegna óeirðanna. Í svari sínu talaði Trump frekar um vinstrisinnaða gagnmótmælendur, sem hann kallaði „hitt vinstrið“ (e. alt-left).

„Ég held að báðum fylkingum sé um að kenna. Hvað með „hitt vinstrið“ sem kom og réðst að, eins og þið segið, „hinu hægrinu“, finna þau fyrir sektarkennd? Hvað með þá staðreynd að þau réðust að hinum með kylfur í höndunum, sveiflandi kylfum. Eiga þau við vandamál að stríða? Ég held það.“



Sagði móður hinnar látnu hafa sagt „fallega hluti“ um sig
Þá sagði Trump að „tvær hliðar væru á öllum sögum“ og að það væri „mikið af vondu fólki í hinum hópnum líka,“ og átti þar við gagnmótmælendurna. Þá sagði hann „gott fólk“ vera í báðum fylkingum, þar á meðal innan raða hvítra þjóðernissinna.

Hvítir þjóðernissinnar, nýnasistar og vopnaðir varaliðsmenn komu saman í Charlottesville um helgina til að mótmæla því að stytta af Robert E. Lee, hershöfðingja Suðurríkjanna í þrælastríði Bandaríkjanna, hafi verið fjarlægð.

Ein kona, Heather Heyer, lést í óeirðunum um helgina þegar fylgismaður þjóðernissinna ók bíl inn í hóp gagnmótmælenda. James Alex Fields var ákærður fyrir morðið á Heyer í gær.

Á blaðamannafundinum í Trump-turni í dag sagði forsetinn að móðir Heyer hefði sagt „fallega hluti“ um sig.

Blaðamannafundurinn í Trump-turni hófst á yfirlýsingu um skipulag innan ríkisstjórnarinnar en leystist fljótt upp í umræður um atburði helgarinnar. Vísir/AFP

Bar styttur sögufrægra forseta saman við styttuna af Robert E. Lee
Þá sakaði Trump þá sem vildu fjarlægja styttuna af hershöfðingjanum og þrælahaldaranum Robert E. Lee um að „endurskrifa söguna“ og nefndi sögufræga Bandaríkjaforseta, sem áttu einnig þræla, og styttur af þeim til stuðnings málstað sínum.

„George Washington var þrælahaldari. Mun George Washington verða minna metinn? Ætlum við að taka niður styttu af George Washington?“ sagði Trump.

„Hvað með Thomas Jefferson, hvað finnst ykkur um Thomas Jefferson, líkar ykkur við hann? Allt í lagi, gott. Ætlum við að taka niður styttur vegna þess að hann átti þræla í stórum stíl? Ætlum við að taka niður styttu af honum? Þannig að vitið þið hvað, þetta er fínt, þið eruð að endurskrifa söguna, þið eruð að endurskrifa menningu.“



Þá var Trump spurður um einn helsta ráðgjafa sinn, Steve Bannon, og sagði hann góðan mann. Þá tók forsetinn fram að Bannon væri „ekki rasisti“ en sagði enn fremur að framtíð hans í Hvíta húsinu væri óljós.

Trump tjáði sig um átökin í Charlottesville á sérstökum blaðamannafundi um óeirðirnar í Hvíta húsinu í gær. Þar fordæmdi hann kynþáttahatur og ofbeldi.

Þá var forsetinn gagnrýndur fyrir að vilja ekki fordæma hvíta þjóðernissinna sérstaklega þegar hann tjáði sig stuttlega um atburðina á laugardag. Þar fordæmdi hann aðeins ofbeldisverk úr „mörgum áttum“ en þá afstöðu sína ítrekaði hann á blaðamannafundinum í dag.


Tengdar fréttir

Gagnrýna forsetann harðlega

Stjórnendur spjallþátta Bandaríkjanna virðast vera sammála um að Donald Trump, forseti, hafi haldið hræðilega á spöðunum varðandi samkomu nýnasista og þjóðernissinna í Charlottesville um helgina.

„Rasismi er af hinu illa“

Donald Trump Bandaríkjaforseti tjáði sig um átök þjóðernissinna og gagnmótmælenda í Virginíu-ríki um helgina á blaðamannafundi í Hvíta húsinu í dag.

Fyrr­ver­and­i kenn­ar­i ök­u­manns­ins seg­ir hann dá Hitl­er

James Alex Fields hefur verið ákærður, meðal annars fyrir morð, fyrir að aka bíl sínum inn í hóp fólks sem var að mótmæla samkomu þjóðernissinna vegna fyrirhugaðs niðurrifs styttu af Robert E. Lee, hershöfðinga Suðurríkjanna í þrælastríði Bandaríkjanna.

Átökin í Charlottesville: „Hatur kom til bæjarins okkar“

Tvítugur karlmaður er í haldi, grunaður um að hafa ekið á friðsama mótmælendur í Charlottesville í gær. Ríkisstjóri Virginíu skipar hvítum þjóðernissinnum og nasistum að hafa sig á brott en ekkert bólar á fordæmingu Donalds Trump forseta á hvítum öfgamönnum eða skoðunum þeirra eftir meiriháttar átök þeirra í bænum í gær.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.