Innlent

Stefna að langtímasamningi um aukin fjárframlög til Hugarafls

Kristín Ólafsdóttir skrifar
Stefnt er að gerð langtímasamnings um aukin framlög til Hugarafls til að styrkja starf samtakanna í þágu fólks með geðraskanir. Þetta var niðurstaða fundar sem félags- og jafnréttismálaráðherra og forsvarsmenn Hugarafls áttu í morgun, að því er fram kemur í tilkynningu frá velferðarráðuneytinu.

Stjórnarmenn Hugarafls, Auður Axelsdóttir, Sigurborg Sveinsdóttir og Árni Steingrímsson, sátu fundinn í dag, auk Halldórs Más Sæmundssonar aðstandanda. Frá ráðuneytinu voru viðstaddir, auk félags- og jafnréttismálaráðherra, aðstoðarmenn hans og aðstoðarmenn heilbrigðisráðherra.

„Á fundinum var farið yfir þá vinnu sem farið hefur fram í ráðuneytinu að undanförnu, sameiginlega af hálfu heilbrigðis- og félagshluta þess, til að greina stöðu Hugarafls og finna leiðir til að styðja við félagið þannig að það nýtist sem best fólki með geðræn vandamál,“ að því er segir í tilkynningu frá velferðarráðuneytinu.

Þá lýsti ráðherra yfir vilja sínum til að efla starf Hugarafls, einkum virkni og endurhæfingarúrræði samtakanna en í tilkynningun segir að þau hafi reynst vel fjölda fólks sem glímt hefur við geðraskanir af ýmsum toga.

„Hugarafl hefur unnið mikilvægt brautryðjandastarf og um árangurinn af starfi samtakanna verður ekki deilt. Það er mikilvægt að starfsemin nái að þróast áfram og eflast og það erum við sammála um að takist best með vönduðum langtímasamningi um starfsemina þar sem fjallað er um markmið og árangursmælingar“ sagði Þorsteinn Víglundsson meðal annars á fundinum,“ sagði Þorsteinn Víglundsson, velferðar- og jafnréttismálaráðherra, meðal annars á fundinum að því er fram kemur í tilkynningu.

Binda vonir við að niðurstaða náist fljótt til að eyða óvissu

Samtökin Hugarafl stóðu fyrir mótmælum við velferðarráðuneytið í byrjun apríl vegna þeirrar fjárveitingar sem samtökunum var ætluð á þessu ári. Alls nam fjárhæðin 1,5 milljónum króna sem forsvarsmenn Hugarafls töldu alltof lítið. Í kjölfar mótmælanna í apríl sagði aðstoðarmaður félagsmálaráðherra að ekki væri hægt að lofa samtökunum meiri fjárveitingar eins og staðan var þá.

Auður Axelsdóttir, forstöðumaður Hugarafls, sagðist á fundinum í dag vera ánægð með þá stefnu sem málefni Hugarafls hafi tekið. Þá sagði hún gerð langtímasamninga æskilega niðurstöðu og að hún treysti því að farsæl lausn náist fljótt sem tryggi starfsemi Hugarafls á næstu mánuðum.

„Við finnum að það er fullur skilningur á því hvað starfsemi Hugarafls er mikilvæg í íslensku samfélagi og erum afar ánægð með þá viðurkenningu,“ sagði Auður meðal annars.

Undir þetta tóku aðrir fulltrúar Hugarafls á fundinum og sögðust hafa miklar væntingar til þeirrar vinnu sem framundan er við gerð langtímasamnings. Þá binda þeir einnig vonir við að niðurstaða náist fljótt til að eyða óvissu.

Styrkir nema samtals 18,6 milljónum króna

Í tilkynningu velferðarráðuneytisins segir enn fremur að Hugarafl hafi frá árinu 2011 notið styrkja frá velferðarráðuneytinu sem nema samtals 18,6 milljónum króna, að mestu frá heilbrigðishluta ráðuneytisins.

Samtökin hafi einnig fengið 5 milljóna króna styrk frá fjárlaganefnd Alþingis árið 2016. Auk þessa sé í gildi samningur milli Hugarafls og Vinnumálastofnunar sem kveður á um þjónustukaup stofnunarinnar af Hugarafli fyrir 10 milljónir króna árlega.

Fyrr í þessum mánuði kröfðust Ungir Píratar þess að Óttarr Proppé, heilbrigðisráðherra, og Þorsteinn Víglundsson, félagsmálaráðherra, kæmu í veg fyrir lokun Hugarafls.


Tengdar fréttir

Ungir Píratar vilja koma í veg fyrir lokun Hugarafls

Hugarafl eru samtök notenda geðheilbrigðisþjónustu og stærstu samtök utan stofnana sem vinna að þessum málaflokki. Áætlað er að 1,5 milljónir króna renni til Hugarafls á þessu ári samanborið við átta milljónir króna í fyrra.

Geta engu lofað en vilja að Hugarafl geti haldið starfi sínu áfram

Karl Pétur Jónsson, aðstoðarmaður Þorsteins Víglundssonar, félags-og jafnréttismálaráðherra, segir að fundur hans og Sigrúnar Gunnarsdóttur, aðstoðarmanns Óttars Proppé, heilbrigðisráðherra, með Hugarafli í dag hafi verið mjög gagnlegur og góður.

Þingmaður Pírata „brjálaður“ yfir skertum framlögum

Þingmaður Pírata segir stórfelldan niðurskurð heilbrigðisráðherra á framlögum til samtakanna Hugarafls vera blauta tusku í andlit þeirra sem þurfa á þjónustunni að halda. Hópur fólks mótmælt þessum niðurskurði í velferðarráðuneytinu í dag.

Hafa bæði upplifað lamandi kvíða

Fyrirlestur um eitthvað fallegt er nýtt leikrit um kvíða. Í verkinu túlka fimm leikarar kvíða og Sigrún Huld og Kjartan Darri eru meðal þeirra en þau hafa bæði upplifað óeðlilegan kvíða í gegnum tíðina.




Fleiri fréttir

Sjá meira


×