Enski boltinn

Sanchez ekki með á föstudag

Eiríkur Stefán Ásgeirsson skrifar
Alexis Sanchez á æfingu með Arsenal.
Alexis Sanchez á æfingu með Arsenal. Vísir/Getty

Alexis Sanchez verður ekki með Arsenal í leik liðsins gegn Leicester í opnunarleik ensku úrvalsdeildarinnar á föstudagskvöld. Þetta staðfesti Arsene Wenger, stjóri Arsenal.

Wenger segir að Sanchez hafi tognað á vöðva í kviði á æfingu á dögunum. Sílemaðurinn spilaði ekki heldur með Arsenal gegn Chelsea í leiknum um Samfélagsskjöldinn á sunnudag af sömu ástæðu.

Óvíst er hversu lengi Sanchez verður frá en telur að það verði ekki meira en tvær vikur. Wenger hefur þó strax útilokað að hann verði með Arsenal þegar liðið mætir Stoke um aðra helgi.

Sanchez hefur verið orðaður við bæði Manchester City og PSG í sumar en Wenger segir að franska liðið hafi ekki óskað eftir viðræðum við Arsenal vegna Sanchez.

Sanchez á eitt ár eftir af samningi sínum við Arsenal og er sagður vilja spila fyrir lið sem keppir í Meistaradeild Evrópu. Sem stendur er ólíklegt að hann muni framlengja samning sinn við Arsenal, sem gæti því misst hann frítt frá félaginu næsta sumar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira