Viðskipti innlent

Fjármálaráðherra vill hafna krónunni

Hulda Hólmkelsdóttir skrifar
Benedikt Jóhannesson fjármálaráðherra
Benedikt Jóhannesson fjármálaráðherra Vísir/Eyþór
Benedikt Jóhannesson fjármálaráðherra segir það vera skyldu fjármálaráðherra að leggja til þann kost sem er farsælastur fyrir Íslendinga. Hann segir íslensku krónuna leiða til óstöðugleika. Þetta segir hann í aðsendri grein í Fréttablaðinu í dag með fyrirsögninni „Má fjármálaráðherra hafna krónunni?“

Þar segir hann krónuna vera óútreiknanlega. Örlitlar breytingar í utanríkisverslun og gjaldeyrisflæði geti haft ófyrirsjáanlegar afleiðingar á hag fyrirtækja og almennings.

„Sterk króna ógnar nú afkomu fyrirtækja sem græddu vel á veikri krónu fyrir fáeinum misserum. Störf í nýsköpun og þekkingariðnaði, sem áttu að tryggja fjölbreytni atvinnulífsins, streyma úr landi á ný. Krónan er hemill á heilbrigð viðskipti,” skrifar ráðherrann.

„Við almenningi blasir ólík mynd. Eftir hrunið var krónan lítils virði og kaupmáttur dvínaði. Nú er öldin önnur. Krónan hefur náð sömu hæðum og fyrir hrun og það er lítið mál að skjótast á fjarlæg heimshorn. Kaupmáttur hefur aukist mikið á Íslandi að undanförnu og verkefni næstu missera er að varðveita hann. Krónan leiðir til óstöðugleika, býr til sveiflur sem leiða til óábyrgra fjárfestingarákvarðana og óstöðugs kaupmáttar. Vextir eru og verða mun hærri á Íslandi en í viðmiðunarlöndum vegna óstöðugleika krónunnar. Þetta er ósanngjarnt og leiðir til óþarfa átaka í samfélaginu.“

Hann heldur áfram og segir að flokkur hans Viðreisn hafi verið stofnaður til að stuðla að sátt og stöðugleika.

„Slíkur stöðugleiki næst aldrei nema með stöðugum gjaldmiðli sem stendur undir nafni og býður upp á svipaða vexti og í nágrannalöndum. Viðreisn bendir á myntráð til þess að festa gengi krónunnar. Mörg Evrópuríki hafa nýtt slíka lausn í áratugi, flest sem áfanga í því að taka upp evru. Eftir hrun töldu sumir krónuvinir að það tæki Íslendinga áratugi að uppfylla skilyrðin fyrir upptöku evru. Eina skilyrðið sem við föllum á núna er of háir vextir.“

Hann spyr því næst hvort fjármálaráðherra megi yfir höfuð hafna krónunni og bendir á að fjármálaráðherrar í nítján Evrópulöndum hafi þegar hafnað sínum miðli fyrir evruna.

„Enn fleiri nýta sér evruna án beinnar aðildar eða tengja gjaldmiðil sinn beint við evru. Já, fjármálaráðherra ber skylda til að leggja til þann kost sem er farsælastur fyrir Íslendinga,” skrifar hann.

„Nú er tíminn til þess að ýta gömlum kreddum til hliðar og þora að marka leið stöðugleika þar sem hagsmunir almennings og fyrirtækja fara saman.“






Fleiri fréttir

Sjá meira


×