Innlent

„Stór varasamur vegur fyrir stóra og breiða bíla“

Gissur Sigurðsson skrifar
Rúta Time Tours valt af veginum sem staðið hefur til að lagfæra.
Rúta Time Tours valt af veginum sem staðið hefur til að lagfæra.
Vegagerðin undribýr nú af kappi uppbyggingu á vegarkaflanum á Þingvöllum þar sem hópferðabíll fullur af farþegum valt út af í gær. Auk þess að vera of mjót ber hann ekki lengur þunga stærstu hópferðabílanna og kantarnir eru orðnir mjög varasamir.

Þetta er vegkaflinn frá þjónustumiðstöðinni í átt að afleggjaranum upp á nýju Lyngdalsheiðina, sem lagður var í tengslum við þjóðhátíðarhöldin árið 1974 og ber hvergi nærri lengur þá umferð sem nú er orðin um hann.

„Það er nú þannig að nú erum við að vinna hörðum höndum að því að bjóða þetta verk út núna í haust þannig að þessi kafli verður breikkaður, byggður upp og gerður öruggari með hliðarfláum,“ segir Óskar Örn Jónsson, deildarstjóri framkvæmdasviðs Vegagerðarinnar.

Aðspurður hvenær sú framkvæmd geti hafist segir hann að Vegagerðin sé nú komin með grænt ljós á framkvæmdina frá Þingvallanefnd og hönnuðir séu nú að teikna veginn.

„Vonandi náum við að bjóða út þennan kafla fyrri hlutann nú í haust og jafnvel seinni kaflann skömmu síðar og jafnvel um leið.“

Ef allt gengur að óskum yrði verkinu lokið eftir rúmt ár eða svo.

En ef maður ekur þennan veg þá finnur maður að hann er orðinn svona missiginn. Eru þessar stærstu rútur ekki orðnar of þungar fyrir burðarþol veganna?

„Jú, við erum með öxulþungatakmörkun á þessum veg átta tonn. Þessar stærstu rútur fara yfir það, sérstaklega ef þær eru með farangursrýmið líka hlaðið,“ segir Óskar.

En stærstu rúturnar fara þarna samt um, eykur það þá ekki hættuna á að vegkantar gefi sig?

„Jú, þetta er bara stór varasamur vegur fyrir stóra og breiða bíla.“




Fleiri fréttir

Sjá meira


×