Lífið

Hætt að ávarpa „dömur og herra“ í neðanjarðarlestum í London

Kristín Ólafsdóttir skrifar
Gleðiganga hinseginfólks var haldin hátíðleg í London á dögunum. Neðanjarðarlestarkerfið lét ekki sitt eftir liggja í skreytingum.
Gleðiganga hinseginfólks var haldin hátíðleg í London á dögunum. Neðanjarðarlestarkerfið lét ekki sitt eftir liggja í skreytingum. Vísir/Getty

Hætt verður að ávarpa „dömur og herra“ í kallkerfum neðanjarðarlestarstöðva í London og ný kveðja tekin upp til að höfða til lestarfarþega af öllum kynjum. BBC greinir frá.

Starfsfólk lestarstöðvana hefur verið beðið um að hefja tilkynningar á orðunum „halló, allir saman,“ eða „hello everyone,“ í stað „dömur mínar og herrar,“ eða „ladies and gentlemen.“ Breytingarnar eru gerðar til að koma til móts við einstaklinga sem ekki finna sér samsvörun í öðru hvoru kyninu.

Baráttusamtökin Stonewall, sem berjast fyrir réttindum hinseginfólks, fögnuðu ákvörðuninni sem naut stuðnings borgarstjóra höfuðborgarinnar, Sadiq Khan.

Khan sagðist ánægður með að neðanjarðarlestarkerfið höfðaði nú til fólks á „hlutlausari hátt.“ Þá lagði talsmaður Stonewall áherslu á mikilvægi tungumálsins í réttindabaráttu hinseginfólks.

„Tungumál er ótrúlega mikilvægt fyrir samfélag hinseginfólks, og það hvernig við notum málið getur hjálpað til við að tryggja að öllum finnist þeir velkomnir.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira