Lífið

Týndum syni feðraveldis fagnað fjálglega á Facebook

Jakob Bjarnar skrifar
Hann er sérkennilega saman skrúfaður hópurinn sem fagnar endurkomu Þórarins á síður Fréttablaðsins.
Hann er sérkennilega saman skrúfaður hópurinn sem fagnar endurkomu Þórarins á síður Fréttablaðsins.

Fréttablaðið kynnti til sögunnar nýjan Bakþankahöfund í morgun og hefur pistill hans vakið mikla athygli og umtal. Má höfundur þó heita kunnuglegur á þessum slóðum en Þórarinn Þórarinsson starfaði árum saman á Fréttablaðinu hvar hann fékkst meðal annars við að stýra innblaðinu og pistlaskrif auk þess að sinna fréttaskrifum.

Þórarinn starfaði árum saman í blaðamennsku, síðast á Séð og heyrt en gerði þá hlé á blaðamennskunni og hvarf til annarra starfa.

Sturlað persónugallerí fagnar Þórarni
Fjölmargir hafa fagnað endurkomu hans á Facebook í dag, svo sem Eiríkur Jónsson, Jón Valur Jensson, Egill Helgason, Gísli Ásgeirsson, Fjalar Sigurðarson og Sigurjón M. Egilsson.

„Já, þetta er sturlað persónugallerí,“ segir Þórarinn hinn ánægðasti með viðtökurnar í samtali við Vísi og heldur því fram að hann geri sér enga grein fyrir því hvað það er sem sameinar þessa umræddu menn í ánægju með skrif hans. „Nema hatur Jóns Vals á Degi borgarstjóra. Það skýrir hans þátt,“ segir Þórarinn og vísar í pistilinn sem fjallar meðal annars um mengun eftir að hreinsibúnaður Veitna bilaði með þeim afleiðingum að saur og sorp rann óhindrað til sjávar. Pólitískum andskotum Dags B. Eggertssonar til mikillar ánægju.

„Síðan er nú rétt að halda því til haga að sumir þessara kalla eru gamlir vinnufélagar, jafnvel vinir. Ætli Eiríki Jónssyni finnist hann til dæmis ekki eiga smá í þeim stíl sem ég skrifa.“

Tilfinningaríkar konur í sjósundi
Nú á tímum þegar kynjafræðin er alfa og omega alls þess sem er, þá verður ekki hjá því litið að þeir sem helst fagna því að þú hafir dustað rykið af pennanum, í þeim skilningi að skrifa í skilgreindan fjölmiðil, eru allt karlar?

„Óneitanlega. Þetta er svolítið eins og týndi sonur feðraveldisins sé kominn heim.“

Eða, með öðrum orðum; hvar eru kvenkyns aðdáendurnir?

„Kannski eru konur meira í sjósundi. Ég lagði nú upp með að æsa þann tilfinningaríka hóp en konurnar gera líka meira af því að fagna í persónulegum samtölum. Það er meira í eðli karlfauska að bera svona lagað út á torg.“
 
Hefur gert út á óvinsældir
Þó að Þórarinn hafi ekki skrifað um hríð í fjölmiðla hefur hann haldið sér við með óumbeðnum athugasemdum á Facebook. Koma þessi miklu og góðu viðbrögð á óvart?

„Já og nei! Ég hef nú frekar gert út á óvinsældir heldur en hitt en til þess ber einnig að líta að skorturinn á almennilega skrifandi fólki með snefil af nothæfu skopskyni er orðinn átakanlegur í hópi fjölmiðlafólks þannig að ...“

Og hér er rétt að láta gott heita í spjalli við nýjan pistlahöfund Fréttablaðsins en til stendur að hann skrifi á þann vettvang tvisvar í mánuði.


Tengdar fréttir

Skólpsund

Aldrei hef ég buslað í söltum sjó við Íslandsstrendur. Heldur ekki farið með börnin mín í fjöruna við Ægisíðu að leita að krabba­klóm í mörg ár.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira