Lífið

Sigur Rós sendir andstæðingi hinseginréttinda tóninn

Kristín Ólafsdóttir skrifar
Jónsi í Sigur Rós er ekki ánægður með Margaret Court.
Jónsi í Sigur Rós er ekki ánægður með Margaret Court. Vísir/AFP

Hljómsveitin Sigur Rós hefur svarað fordómafullum ummælum ástralsks prests, og fyrrum tennisstjörnu, með skilaboðum sem sveitin lét prenta á boli. Presturinn fordæmdi samkynja hjónabönd í maí síðastliðnum en hljómsveitin lét útbúa bolina sérstaklega fyrir tónleikaferð sína um Ástralíu nú í júlí.

Listamaðurinn Andrew Rae hannar bolina en framan á þeim sjást tvö pör, tvær konur annars vegar og tveir karlmenn hins vegar, sem halda sín á milli á giftingarhringum. Þá sjást bæði íslenski og ástralski fáninn á bolunum, auk ýmissa kyngervismerkja og annarra skreytinga. Fyrir miðju á bolnum stendur á íslensku „Sameinuð stöndum vér.“

Margaret Court, sem þekktust er fyrir farsælan tennisferil, starfar nú sem prestur í borginni Perth í Ástralíu. Hún vakti athygli með ummælum sínum í maí síðastliðnum þegar hún fordæmdi flugfélagið Quantas fyrir að styðja samkynja hjónabönd. Hún bætti einnig um betur með fleiri ummælum, lituðum af fordómum í garð samkynhneigðra.

Í tilkynningu, sem Sigur Rós birti á Facebook-síðu sinni, segir að sveitin hafi fyrirskipað gerð bolanna sérstaklega fyrir væntanlegt tónleikaferðalag sitt. Bolirnir séu framleiddir vegna ummæla Margaret Court, starfandi prests og fyrrum tennisstjörnu, en sveitin mun spila á leikvangi nefndum í höfuðið á henni í lok júlí.

„Við vitum að skoðanir Margaret Court eru ekki algildar í Ástralíu. Við viljum bæta rödd okkar við ákall fyrir jöfnun réttindum til hjónabands í Ástralíu – akkúrat hérna á Margaret Court Leikvanginum sjálfum,“ segir í tilkynningunni frá sveitinni.

Ágóði af sölu bolanna mun renna til góðgerðarsamtaka sem berjast fyrir lögleiðingu samkynja hjónabanda í Ástralíu.

Sigur Rós mun spila á Margaret Court-leikvanginum þann 27. júlí næstkomandi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira