Innlent

Flateyjargátan í uppnámi

Þórgnýr Einar Albertsson skrifar
Hilmar Sigurðsson, forstjóri Saga Film.
Hilmar Sigurðsson, forstjóri Saga Film. vísir/Ernir

Framleiðslu þáttaraðarinnar Flateyjargátan, er byggjast á samnefndri bók Viktors Arnars Ingólfssonar, hefur verið slegið á frest þar sem ekki fékkst úthlutun úr Kvikmyndasjóði.

Hilmar Sigurðsson, forstjóri Saga Film, segir að upphaflega hafi verið sótt um úthlutun á síðasta ári, því hafi verið hafnað sökum peningaleysis. „Þá erum við hvött til að sækja um aftur sem við gerðum í nóvember. Svarið við því kemur síðan 17. mars. Þá er styrkveitingu hafnað en okkur boðið viðyrði fyrir því að fá styrk á næsta ári,“ segir Hilmar en verkefnið er samframleiðsla Saga Film og Reykjavík Films.

Vegna skuldbindinga við erlenda aðila, meðal annars norrænar ríkisstöðvar, sem og væntanlegt starfsfólk, um að tekið yrði upp í haust sendu framleiðendur Kvikmyndamiðstöð beiðni um að fá að taka upp í ár en að fá styrkinn ekki fyrr en á næsta ári.

„Síðan fáum við svar frá Kvikmyndamiðstöð um að samkvæmt vinnureglum sjóðsins geti miðstöðin ekki gert við okkur samning. Samningur þarf að liggja fyrir áður en er farið í tökur svo við getum síðan fengið fjármagnið. Kvikmyndamiðstöðin byggir það á því að sjóðurinn geti ekki gert við okkur samning sem falli til á núverandi fjárhagsári vegna bókhaldsreglna um að þeir þurfi að bókfæra hann á þessu ári,“ segir Hilmar.

Laufey Guðjónsdóttir, forstöðumaður Kvikmyndamiðstöðvar Íslands. vísir/Anton brink

Eftir að hafa fengið lögfræðiálit, sem Hilmar segir hafa verið á öndverðum meiði við útskýringar Kvikmyndamiðstöðvar, leituðu framleiðendur til mennta- og menningarmálaráðuneytisins. Fól ráðherra loks Kvikmyndamiðstöð að gera téðan samning við framleiðendur. „Vandamálið er það að þetta kemur of seint. Við vorum búin að fresta verkefninu,“ segir Hilmar og bætir því við að ekki hafi gengið að koma verkefninu af stað aftur þar sem það fólk sem átti að koma að því hefði ráðið sig annað.

Hilmar segir forgangsröðun Kvikmyndamiðstöðvar skrítna. „Þetta verkefni er búið að vera lengi í þróun og hefur fengið ótrúlegar umsagnir. Þegar við sækjum um á eftir að útdeila svokölluðum seinni styrkjum. Það voru allavega meiri fjárhæðir í sjóðnum en við vorum að fara fram á.“

„Þegar maður lítur yfir rökin þá finnst mér þetta mjög undarleg ákvörðun. Sérstaklega þar sem við uppfyllum öll skilyrði Kvikmyndamiðstöðvar. Við erum með fullskrifuð handrit, mjög góða aðra fjármögnun þar sem búið er að selja þetta víða og svo hefur þetta fengið mjög góðar umsagnir frá ráðgjöfum Kvikmyndamiðstöðvar og þeir mælt með styrkveitingu,“ segir Hilmar og bætir því við að nú séu framleiðendur í viðræðum við erlenda samstarfsaðila um framhaldið.

Laufey Guðjónsdóttir, forstöðumaður Kvikmyndamiðstöðvar, segir að ráðuneytið setji reglurnar. „Ég held að Hilmar viti ósköp vel að þær voru settar fyrir nokkrum árum síðan og okkur var gert að fara eftir þeim.

Varðandi forgangsröðun segir Laufey aldrei hægt að veita fleiri styrki en fjármagn er til fyrir. „Því miður eru alltaf þó nokkur verkefni sem fá jákvæðar umsagnir og eru vel fjármögnuð en komast ekki að. Fjármagnið er alltaf takmarkandi þáttur.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira