Viðskipti innlent

Lánshæfiseinkunn íslenska ríkisins hækkar

Kjartan Kjartansson skrifar
Fitch Ratings gefur Íslandi nú lánshæfiseinkunnina A-. Það er sjöunda hæsta einkunnin sem fyrirtækið gefur.
Fitch Ratings gefur Íslandi nú lánshæfiseinkunnina A-. Það er sjöunda hæsta einkunnin sem fyrirtækið gefur. Vísir/EPA
Matsfyrirtækið Fitch Ratings hækkaði lánshæfiseinkunn íslenska ríkisins á langtímaskuldbindingum í innlendri og erlendri mynt í dag. Einkunn Íslands er nú A- sem er ofarlega í meðaltali hjá fyrirtækinu. Horfur Íslands eru sagðar jákvæðar og vísar matsfyrirtækið til batnandi ytri stöðu þjóðarbússins, skuldalækkunar hins opinbera ásamt sterkum hagvexti í rökstuðningi sínum.

Ísland er nú aftur komið í flokkinn A- hjá þremur stærstu matsfyrirtækjum heims, að því er kemur fram í tilkynningu frá fjármála- og efnahagsráðuneytinu.

Í tilkynningu Fitch segir að þættir sem gætu hver um sig eða allir saman leitt til hækkunar á lánshæfiseinkunn séu þrautseigja þjóðarbúsins til þess að mæta ytri áföllum eftir afnám fjármagnshafta, áframhaldandi hagvöxtur án of mikils þjóðhagslegs ójafnvægis og áframhaldandi lækkun skuldahlutfalla hins opinbera, studd af ábyrgri ríkisfjármálastefnu.

Þá segir að þar sem horfurnar séu jákvæðar búist Fitch ekki við framvindu sem væri líkleg til þess að leiða til lækkunar á lánhæfiseinkunn.

Þó gætu nokkrir þættir, hver um sig eða allir saman, leitt til neikvæðrar breytingar á lánshæfismati. Nefnir Fitch vísbendingar um ofhitnun hagkerfisins, til dæmis með víxlhækkun launa og verðlags, verðbólgu umfram markmið, með neikvæðum áhrifum á efnahagsreikninga heimila og fyrirtækja,veikari ásetning um að efla stöðu ríkisfjármála til meðallangs tíma og mikið útflæði fjármagns sem leiða myndi til ytra ójafnvægis og þrýstings á gengi krónunnar.


Tengdar fréttir

Fitch hækkar lánshæfismat Íslandsbanka

Alþjóðlega lánshæfismatsfyrirtækið Fitch Ratings hækkaði í dag lánshæfismat Íslandsbanka í BBB/F3 úr BBF3-/F3 með stöðugum horfum.






Fleiri fréttir

Sjá meira


×