Innlent

Skýrsla Hannesar Hólmsteins kynnt í október

Erna Agnes Sigurgeirsdóttir skrifar
Hannes átti upphaflega að skila skýrslunni í júlí 2015. Hann segir að töf á skilum hafi ekki breytt kostnaði við skýrsluna.
Hannes átti upphaflega að skila skýrslunni í júlí 2015. Hann segir að töf á skilum hafi ekki breytt kostnaði við skýrsluna. vísir/stefán
Skýrsla Hannesar Hólmsteins, prófessors í stjórnmálafræði við Háskóla Íslands, um erlenda áhrifaþætti bankahrunsins 2008 verður kynnt 8. október. Að sögn forstöðumanns Félagsvísindastofnunnar, Guðbjargar Andreu Jónsdóttur, er skýrslan í yfirlestri.

„Hann sagði við mig fyrir stuttu síðan að þetta væri komið í yfirlestur. Hann er búinn að gefa fólki kost á því að gera athugasemdir,“ segir Guðbjörg í samtali við  Vísi.

Kostnaðurinn sá sami

Hannes átti upphaflega að skila skýrslunni í júlí 2015. Skýrslan er unnin fyrir fjármálaráðuneytið sem gerði samning við Félagsvísindastofnun um gerð skýrslunnar. Hann segir að töf á skilum hafi ekki breytt kostnaði við skýrsluna.

Guðbjörg Andrea Jónsdóttir, forstöðumaður félagsvísindastofnunar.Háskóli Íslands
„Það er von á skýrslunni bráðlega. Ólíkt ýmsum skýrslum, sem rannsóknarnefndir Alþingis tóku að sér, eru greiðslur ekki breytilegar, svo að töfin á skilum hefur ekki valdið neinum aukakostnaði. Skýrslan mun kosta 10 millj. kr. eins og samið var um. Ég hef ekki fengið neitt greitt fyrir skýrsluna og mun ekki fá, heldur Félagsvísindastofnun Háskóla Íslands,“ segir Hannes í skriflegu svari við fyrirspurn Vísis.

Guðbjörg Andrea segir að greiðslur fyrir skýrsluna renni til Rannsóknarseturs í stjórnmálum og efnahagsmálum sem heyri undir Félagsvísindastofnun. Að sögn Guðbjargar eru fleiri að vinna að þessu verkefni með Hannesi og nefnir meðal annars Eirík Bergmann, stjórnmálafræðing.

Eiíkur Bergmann, prófessor í stjórnmálafræði.Vísir/Eyþór
Eiríkur segir að hann sé ekki að vinna að skýrslunni sjálfri heldur að annarri skýrslu um Icesave deiluna, sem tengist verkefninu að því leyti að verið sé að skoða erlend áhrif á hrunið.

Skýrsla Eiríks hefur verið birt og í henni kemur fram að hún hafi verið styrkt af Félagsvísindastofnun Háskóla Íslands í gegnum rannsóknarverkefni um erlend áhrif bankahrunsins. Eiríkur býst við því að Hannes muni nýta skýrsluna um Icesave sem heimild í sinni skýrslu

Facebookfærsla Hannesar þar sem hann tekur fram að fyrirlesturinn sé byggður á skýrslu sem hann vann um norrænu leiðirnar sem sé byggð á skýrslu hans um hrunið.Skjáskot
Kynnir niðurstöður á ráðstefnum

Hannes tók þátt í ráðstefnu í apríl á Havaí á vegum Sambands um einkarekstur í skólakerfinu (The Association of Private Enterprise Education ) og fjallaði þar um norræna kerfið og velgengni þess. 

Hannes greindi frá því í færslu á Facebook í febrúar að fyrirlesturinn væri að mestu leyti saminn upp úr skýrslu hans fyrir fjármálaráðuneytið. Hann staðfestir þó að hann haldi reglulega kynningar á rannsókninni erlendis. Í skriflegu svari segist Hannes ekki hafa fjallað sérstaklega um niðurstöður skýrslunnar á þeirri ráðstefnu. 

En ég hef kynnt margar niðurstöður mínar í rannsókninni á bankahruninu á öðrum ráðstefnum erlendis og hérlendis. Til dæmis kynnti ég nokkrar niðurstöður á ráðstefnu í Búdapest að viðstöddum fyrrv. fjármálaráðherra Bretlands, Lamont lávarði, og baðst hann afsökunar á beitingu hryðjuverkalaganna,“ segir Hannes.

Hann bendir jafnframt á að hægt sé að nálgast fyrirlestra hans inn á heimasíðu Rannsóknarseturs um nýsköpun og hagvöxt.


Tengdar fréttir

Styttri Íslendingasögur frá Hannesi Hólmsteini

Hannes Hólmsteinn Gissurarson, prófessor í stjórnmálafræði, hellir sér út í ferðamannabransann og sendir frá sér þrjár Íslendingasögur á ensku. Helsta vandann við Íslendingasögur segir Hannes vera að þær séu of langar með of mörgum ættartölum.




Fleiri fréttir

Sjá meira


×