Innlent

Skipstjóri hjólabátsins ákærður fyrir manndráp af gáleysi

Erna Agnes Sigurgeirsdóttir skrifar
Maðurinn er 24 ára að aldri en var 22 ára þegar slysið átti sér stað.
Maðurinn er 24 ára að aldri en var 22 ára þegar slysið átti sér stað. Vísir/Valli

Búið er að ákæra skipstjóra hjólabáts, sem bakkaði yfir kanadíska konu sumarið 2015, fyrir manndráp af gáleysi. Skipstjórinn hafði ekki réttindi til að stjórna bátnum. Að auki virkaði ekki bakkmyndavél bátsins og enginn baksýnisspegill var stjórnboðsmegin. Maðurinn, sem er 24 ára að aldri, á yfir höfði sér allt að sex ára fangelsi. Þetta kemur fram inn á vef RÚV.

Málið hefur verið til rannsóknar hjá Lögreglunni á Suðurlandi í tvö ár. Stefnt er að því að þingfesta málið í Héraðsdómi Austurlands á mánudaginn.

Konan sem lést var ferðamaður hér á landi og var á ferðalagi um Suðurland ásamt fjölskyldu sinni. Þegar slysið átti sér stað fylgdist fjölskyldan með þyrlu lenda á malarsvæði fyrir aftan bátinn. Það var þá sem skipstjórinn bakkaði, án þess að líta aftur fyrir sig.

Í skýrslu Rannsóknarnefndar samgönguslysa kom fram að skipstjórinn hefði alfarið treyst á þann sem gaf honum merki um að í lagi væri að bakka.Þar kemur einnig fram að fólkið hefði ekki heyrt í bátnum þar sem hávaðinn frá þyrlunni yfirgnæfði hljóðið.

Ekki náðist í Einar Björn Einarsson, eiganda ferðaþjónustufyrirtækisins Jökulsárlóns, við gerð þessarar fréttar.
 


Tengdar fréttir

Réttindalaus á hjólabát bakkaði yfir ferðakonu

Skipstjóri hjólabáts sem bakkaði yfir konu og varð henni að bana við Jökulsárlón árið 2015 hafði ekki réttindi til að stjórna bátnum. Rannsóknarnefnd samgönguslysa segir að ríkið þurfi að afmarka umferð við lónið til að tryggja öryggi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.