Lífið

Kóngar hjóla milli kirkna

Gunnþóra Gunnarsdóttir skrifar
Kóngarnir Sveinn Sveinsson, Sólmundur Friðriksson, Kristján Jóhannsson, Elmar Þór Hauksson og Arnór B. Vilbergsson, kantor Keflavíkurkirkju og stjórnandi.
Kóngarnir Sveinn Sveinsson, Sólmundur Friðriksson, Kristján Jóhannsson, Elmar Þór Hauksson og Arnór B. Vilbergsson, kantor Keflavíkurkirkju og stjórnandi.
Við erum að gera organistanum svolítinn greiða. Hann vantar nýtt orgel, er orðinn þreyttur á að bíða eftir fjárveitingu og notar okkur vini sína,“ segir Kristján Jóhannsson söngvari (ekki samt tenórinn að norðan) um áheitahjólatúr karlakvartettsins Kónganna milli kirkna á Suðurnesjum á laugardaginn. Glöggt mé heyra að Kristján er ekki par hrifinn af áreynslunni sem túrnum fylgir en finnst organistinn alveg ágætur og málefnið enn betra.

„Organistinn er okkar fimmti meðlimur og undirleikari – en hann er mikill hjólamaður, tímir ekki að eiga bíl og á hugmyndina að þessu ævintýri. Við höfum því, í okkar indæla skepnuskap, látið hann um að skipuleggja þetta allt saman.“

Hláturinn kraumar í Kristjáni. Hann tekur þó fram að lagt verði upp í kristilegum anda og öllum sé velkomið að slást í för. „Við erum búnir að neyða alla nákomna til að vera með okkur og vonandi koma einhverjir af fúsum og frjálsum vilja,“ tekur hann fram og segir „ábyrga aðila“ hafa farið yfir planið hjá organistanum.

„Við komumst fljótt að því að ef við ætluðum að dobla fólk með okkur yrði að gera ráðstafanir. Einn af kóngunum á gamlan hertrukk og ef einhver vill henda hjólinu sínu upp á hann má það, svo erum við líka með strætó. Þannig getur fólk verið með og hvílt sig á milli. Að sjálfsögðu verða þrír af kóngunum að hjóla en við hinir, ábyrgu aðilarnir í hópnum, ætlum að keyra vörubílinn og strætóinn. Svo syngjum við alltaf saman. Það er punkturinn.“

Þið tveir puðið þá ekki eins mikið og hinir, bendir blaðamaður á. „Heldur þú að það sé ekki puð að keyra strætó og halda uppi stuði þar með einhverju liði allan daginn? Svo þarf að róta fyrir þetta lið, setja upp nóturnar og svona,“ segir Kristján og þykist hneykslaður.

En hvað eru kirkjurnar margar og hversu löng er vegalengdin? „Þetta er hellingur af kirkjum og enn fleiri kílómetrar. Við byrjum í Keflavík klukkan níu, þaðan verður haldið í Útskálakirkju í Garði, svo út að Hvalsnesi, þaðan út í Hafnir, úr Höfnum í Grindavík, frá Grindavík í Kálfatjörn á Vatnsleysuströnd, í Innri-Njarðvíkurkirkju, Ytri-Njarðvíkurkirkju og endað í Keflavík.

Alls eru þetta 113 kílómetrar og við reiknum með hálftímastoppi á hverjum stað því Kóngarnir syngja alls staðar. Þetta er alveg þokkalega erfitt. Þeir hinir fóru í æfingaferð um daginn, ég var svo heppinn að vera á Akureyri þá, og þeir eru enn að tala um hvað hún hafi verið strembin.

En tilgangur ferðarinnar nú er að safna í orgelsjóðinn og þeir sem vilja styðja kóngareiðina geta lagt inn á reikning 0121-15-350005, kt. 680160-5789. Fólk sem sagt heitir á Kóngana – hvort þeir geti hjólað þetta eða ekki – það er sama upphæðin!“






Fleiri fréttir

Sjá meira


×