Innlent

Bandaríska heilbrigðisstofnunin veitir 130 milljónir til íslenskrar svefnrannsóknar

Kristín Ólafsdóttir skrifar
Háskóli Íslands hefur átt í formlegu samstarfi um svefnrannsóknir undir stjórn Þórarins Gíslasonar, lungnalæknis, frá árinu 2001.
Háskóli Íslands hefur átt í formlegu samstarfi um svefnrannsóknir undir stjórn Þórarins Gíslasonar, lungnalæknis, frá árinu 2001. Vísir/gva

Bandaríska heilbrigðisstofnunin (National Institute of Health) hefur veitt Þórarni Gíslasyni, yfirlækni á lungnadeild Landspítalans og prófessor við læknadeild Háskóla Íslands, og alþjóðlegum samstarfshóp hans 130 milljón króna styrk til rannsóknar á kæfisvefni. Þetta kemur fram á vef Háskóla Íslands.

Þórarinn hefur stundað lungnalækningar og rannsóknir á kæfisvefni í nær þrjá áratugi og hefur um árabil verið í fremstu röð þeirra vísindamanna sem rannsaka kæfisvefn og áhrif hans á sjúklinga. Styrkurinn sem hann hlaut í vikunni er til fimm ára.

„Markmið rannsóknarinnar er að kanna hvernig blóðþrýstingssvörun sjúklinga breytist samhliða meðferð með svefnöndunartæki og leitað verður erfða- og lífeðlisfræðilegra skýringa á mismunandi blóðþrýstingssvörun einstaklinga með kæfisvefn. Einnig verður þáttur einstaklingsbundins breytileika í gerð og starfsemi öndunarvegar kannaður með segulómskoðun og lífeðlisfræðilegum mælingum í svefni,” segir um rannsóknina á vef Háskóla Íslands.

Heildarupphæð styrksins til rannsóknar á kæfisvefni er um 1,1 milljarður króna. Hlutur Íslands, og þar með Þórarins, er þar af um 130 milljónir króna en Bandaríska heilbrigðisstofnunin hefur í tvígang áður styrkt verkefni samstarfshópsins.

Þá hafa Háskóli Íslands, Landspítalinn og Háskólinn í Pennsylvaníu í Bandaríkjunum átt í formlegu samstarfi um svefnrannsóknir undir stjórn Þórarins frá árinu 2001.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira