Sport

Fyrrverandi UFC-bardagakappi lést eftir boxbardaga

Tómas Þór Þórðarson skrifar
Tim Hague lifði í tvo daga eftir síðasta bardagann sinn.
Tim Hague lifði í tvo daga eftir síðasta bardagann sinn. mynd/skjáskot

Tim Hague, fyrrverandi MMA-bardagakappi sem keppti í UFC, er látinn eftir að vera rotaður í hnefaleikabardaga á föstudagskvöldið. Hann lést á sjúkrahúsi í gær vegna höfuðhöggs sem hann hlaut í bardaganum.

Hague skipti úr MMA í hnefaleika fyrir sex árum síðan eftir tveggja ára feril innan UFC. Maðurinn sem rotaði hann heitir Adam Braidwood en hann er fyrrverandi ruðningskappi sem spilaði í Kanada.

Braidwood lét höggin dynja á Hague í annarri lotu og það síðasta varð til þess að Hague steinrotaðist. Hann náði að standa upp á endanum og var færður á sjúkrahús. Þar fór hann í dá áður en hann andaðist svo í gær.

Þetta skelfilega atvik kemur upp aðeins tveimur mánuðum áður en MMA-bardagakappinn og UFC-ofurstjarnan Conor McGregor stígur inn í hnefaleikahringinn á móti Floyd Mayweather Jr. en sviplegt fráfall Hague á vafalítið eftir að hafa áhrif á umræðuna fyrir þann bardaga.

Tim Hague var 33 ára gamall þegar hann lést.

Hér að neðan má sjá myndband af síðustu sekúndum Hague í hringnum og höggið sem fellir hann til jarðar.




Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira