Lífið

Sumarspá Siggu Kling - Sporðdrekinn: Gott fyrir þig að hafa marga bolta á lofti

Elsku Sporðdrekinn minn, það væri svo rosa gott fyrir þig að hætta bara að hugsa. Allt of margar hugsanir og pælingar skapa í raun bara rykugan heila. Þú magnar upp allt sem þú hugsar og síendurteknar hugsanir af hinu sama þreyta þennan sólríka persónuleika þinn. Við hugsum 65 þúsund hugsanir á hverjum degi og í 90% tilfella eru þetta sömu hugsanirnar og í gær, þetta getur haft lamandi áhrif.

Þú ert að fara í tímabil þar sem þú finnur fyrir miklu frelsi. Líkaminn verður þér góður og heilsan, sem skiptir svo miklu máli, verður betri með hverjum deginum. Þú ert svo ótrúlega sterkbyggður og kraftmikill. Svo ertu einstaklega viljasterkur og þar sem er vilji, þar er vegur.

Hvatvísin og fljótfærnin á það svo til að skemma fyrir þér, svo teldu upp að tíu áður en þú sendir skilaboð út eða lætur fólk fara í taugarnar á þér, fólk sem þú jafnvel þekkir ekki neitt. Gefðu þessu tímabili mikla þolinmæði því „þolinmæði“ er lausnarorðið til að allt fari eins og þú vilt.

Það hefur komið fyrir þig að verða alveg örmagna af þreytu þó þú hafir ekki ástæðu til. Þú þarft að skoða það mjög nákvæmlega hvað vantar í líkamann þinn, hvort þú þurfir að fara í blóðprufu, laga mataræðið eða bara einfalda allt í kringum þig í lífinu.

En þetta sumar skapar skemmtileg tækifæri, gefur þér meiri möguleika á að gera það sem þig dreymir um og þú finnur mikla þörf til að standa með sjálfum þér. Í ástinni skaltu ekki láta þörf fyrir spennu grípa þig heljartökum, það sama á við um hvatvísina.

Ég elska hins vegar hvatvísa Sporðdreka því þeir eru svo miklu meira spennandi en allir aðrir, en núna þarftu að hafa mikla stjórn, sem er nákvæmlega það sem gerist hjá þér. Og ég vil bæta við að þú gerir eitthvað svo góða samninga á næstunni og nærð að ganga frá hlutum sem þig langar svo mikið til að klára innan nokkurra mánaða. Þetta mun skapa þér öryggi.

Það er gott fyrir þig að hafa marga bolta á lofti, geta svolítið hlaupið úr einu í annað í staðinn fyrir að vinna bara í einu í algjöru í öryggi. Það er svo ótalmargt sem þú getur, en þú þarft bara að gera þér grein fyrir því.

Mottó: Ekki bíða eftir því að tækifærin komi, farðu bara og sæktu þau – þú hefur það sem til þarf!

Frægir Sporðdrekar: Birkir Már Sævarsson landsliðsmaður, Dísa í World Class, Helga Braga Jónsdóttir leikkona, Björk Guðmundsdóttir söngkona, Scarlett Johansson leikkona, Whoopie Goldberg leikkona, Sigríður Elva Vilhjálmsdóttir sjónvarpskona, Emmsjé Gauti rappari, Björk, Indira Ghandi, Karl bretaprins, Hillary Clinton, Leonardo DiCaprio, Magnús Scheving,  Steingrímur Sævarr Ólafsson fjölmiðlaráðgjafi.






Fleiri fréttir

Sjá meira


×