Formúla 1

Toto Wolff: Ósatt að Mercedes ætli að hætta í Formúlu 1

Kristinn Ásgeir Gylfason skrifar
Toto Wolff, liðsstjóri Mercedes segir liðið ekkert vera á leiðinni út úr Formúlu 1 og að Eddie Jordan hafi kannski djammað aðeins of hart í Mónakó.
Toto Wolff, liðsstjóri Mercedes segir liðið ekkert vera á leiðinni út úr Formúlu 1 og að Eddie Jordan hafi kannski djammað aðeins of hart í Mónakó. Vísir/Getty
Toto Wolff, liðsstjóri heimsmeistaranna í Mercedes liðinu í Formúlu 1, blæs á allar sögusagnir um að Mercedes ætli að draga sig úr keppni í Formúlu 1 eftir tímabilið 2018.

Eddie Jordan, fyrrum eigandi Jordan liðsins í Formúlu 1 og nú sérfræðingur Channel 4 í Formúlu 1 hleypti orðrómnum af stað. Hann sagði í samtali við þýska fjölmiðla að Mercedes myndi hverfa aftur til hlutverks vélaframleiðanda eftir tímabilið 2018.

Eddie Jordan í Mónakó. Spurningin er hvort hann hafi eitthvað fyrir sér um útgöngu Mercedes.Vísir/Getty
Jordan segir að hann myndi gera það ef hann stjórnaði Mercedes. Hann segist hafa viðrað skoðun sína við Dieter Zetsche, yfirmann Daimler sem er eignarhaldsfélagið sem rekur Mercedes-Benz. Að sögn Jordan hafnaði Zetsche ekki hugmyndum hans.

Wolff hefur hins vegar sagt hugmyndir Jordan byggðar á sandi. Wolff benti á að liðið hefur samið um viðveru sína í Formúlu 1 út árið 2020.

„Þessar sögusagnir eru ekki byggðar á staðreyndum og sýna ekkert meira en skaðlegar ágiskanir eins manns,“ sagði Wolff.

„Mónakó er staður þar sem fólki finnst gaman að djamma, svo virðist sem einhver hafi gert aðeins of mikið af því,“ sagði Wolff einnig og vísar til orðrómsins en Jordan segist hafa talað við Zetsche í Mónakó.

„Mercedes er samningsbundið til þátttöku í Formúlu 1 út árið 2020 og stendur eins og er í viðræðum við nýja eigendur um næstu skref eftir að því tímabili lýkur,“ bætti Wolff við.


Tengdar fréttir

Bílskúrinn: Frekja í Furstadæminu Mónakó

Sebastian Vettel á Ferrari náði sér í 25 stiga forskot á Lewis Hamilton á Mercedes í heimsmeistarakeppni ökumanna, með því að vinna Mónakókappaksturinn um helgina.

Pascal Wehrlein er heill heilsu og má keppa

Sauber ökumaðurinn, Pascal Wehrlein lenti í árekstri við Jenson Button í Mónakó og endaði á hlið upp við varnarvegg. Hann hefur nú verið skoðaður af læknum og má aka í Kanada næstu helgi.




Fleiri fréttir

Sjá meira


×