Lífið

Pippa Middleton gengur í það heilaga

Anton Egilsson skrifar
Pippa Middleton er glæsileg í brúðkarkjól frá Giles Deacon.
Pippa Middleton er glæsileg í brúðkarkjól frá Giles Deacon.
Pippa Middleton, systir Katrínar Middleton, hertogaynju af Cambridge, mun síðar í dag ganga í það heilaga með unnusta sínum, bankamanninum James Matthews.

Brúðkaupið verður hið glæsilegasta en vígslan mun eiga sér stað í kirkju heilags Markúsar í þorpinu Englefield í Berkshire, nálægt þeim stað sem Pippa ólst upp. Veislan verður svo haldin í garði foreldra hennar. Kostnaður við brúðkaupið er sagður vera um 250 þúsund pund eða tæpar 33 milljónir króna.

Pippa og Matthews trúlofuðu sig síðasta sumar en þá höfðu þau einungis verið saman í tæpt ár. Þau áttu að vísu í stuttu ástarsambandi árið 2012 en í millitíðinni trúlofaðist Pippa bankamanninum Nico Jackson en upp úr trúlofun þeirra slitnaði.

Gestir eru þegar farnir að streyma í brúðkaupið en í hópi brúðkaupsgesta eru Vilhjálmur Bretaprins og Katrín og þá mun Georg litli prins aðstoða Pippu frænku og halda á slöri hennar þegar hún gengur inn kirkjugólfið. Þá verður Karlotta litla ein brúðarmeyja.

Harry prins er mættur á svæðið en honum var boðið ásamt kærustu sinni, bandarísku leikkonunni Meghan Markle. Útlit er fyrir að Markle muni þó ekki láta sjá sig við athöfnina en Harry mætti til  brúðkaupsins ásamt bróður sínum Vilhjálmi.

Brúðarkjóllinn frá Giles Deacon

Mikil leynd hefur hvílt yfir því hver hannar brúðarkjól Pippu og höfðu ýmsir hönnuðir verið nefndir til sögunnar. Nú liggur það hins vegar ljóst fyrir að kjóllinn sem Pippa klæðist var hannaður af Giles Deacon og er hann afskaplega glæsilegur.  

„Ég var í sjöunda himni með að fá að vinna að brúðarkjólnum með Pippu,” sagði Giles Deacon í samtali við Telegraph.  

Pippa komst fyrst í kastljós fjölmiðla í brúðkaupi Katrínar, systur sinnar, og Vilhjálms prins árið 2011. Þar vakti hún gríðarlega athygli og gengu sumir svo langt að segja að hún hafi stolið senunni.






Fleiri fréttir

Sjá meira


×