Lífið

Dagur rauða nefsins hjá UNICEF: Sturla Atlas hannar rauða nefið í ár

Tryggvi Páll Tryggvason skrifar
Dagur rauða nefsins verður haldinn 9. júní næstkomandi. Dagurinn er langstærsti viðburður Unicef og er markmiðið að fá landsmenn til þess að hjálpa börnum og gerast heimsforeldrar UNICEF

Saga Garðarsdóttir og Dóra Jóhannsdóttir eru grínstjórar dags rauða nefsins og hafa þær með hjálp Tjarnargötu og ótal listamanna útbúið fjölmarga sketsa sem sýndir verða í nokkurra klukkustunda beinni útsendingu á RÚV föstudaginn 9. júní.

Vísir frumsýnir fyrsta sketsinn en þar má sjá strákana í Sturla Atlas leika leikstjóra að gera auglýsingu fyrir rauða nefið hjá UNICEF en dagur rauða nefsins er á næsta leyti. Sturla Atlas hefur síðustu misseri hannað ilmvötn, vatnsflöskur, flíspeysur og buff.

Með þeim er Katrín Halldóra Sigurðardóttir sem hefur gert garðinn frægan sem Ellý Vilhjálms í Borgarleikhúsinu.

Í sketsinum má meðal annars sjá Ragnar Kjartansson, Halldóru Geirharðsdóttur, Aron Can, Sveppa og Kristbjörgu Kjeld pósa með rautt nef ásamt öllum helstu stjörnum Íslands.

Með degi rauða nefsins vill UNICEF skemmta fólki og vekja um leið athygli á að heimsforeldrar og UNICEF berjast saman fyrir betri heimi fyrir öll börn. Grínistar, leikarar, tónlistarmenn og fjölmiðlafólk búa saman til ógleymanlegt kvöld og skora á áhorfendur að hjálpa börnum og gerast heimsforeldrar UNICEF.


Tengdar fréttir

Fyrstu grínstjórar dags rauða nefsins

Hinn árlegi dagur rauða nefsins er stærsti viðburður UNICEF á Íslandi og er hann haldinn 9. júní í ár. Það voru þær Saga Garðarsdóttir og Dóra Jóhannsdóttir sem voru valdar grínstjórar þessa árs, en þetta er í fyrsta skiptið sem þeirri nafnbót er útdeilt.






Fleiri fréttir

Sjá meira


×