Lífið

Mikið af peningum til sem fólk veit varla af

Benedikt Bóas og Stefán Árni Pálsson skrifa
Stella Rózenkranz, Ásgeir Hjartarson, Bergþóra Þórsdóttir, Steinunn, Soffía, Þórdís Imsland og Einar Egilsson.
Stella Rózenkranz, Ásgeir Hjartarson, Bergþóra Þórsdóttir, Steinunn, Soffía, Þórdís Imsland og Einar Egilsson. VÍSIR/STEFÁN ÁRNI
Steinunn Camilla og Soffía Jónsdóttir, umboðsmenn Svölu, hafa fjölmörg járn í eldinum, meðal annars tækninýjungina UNNA, sem hjálpar listamönnum að fá borgað fyrir vinnu sína.

„Við erum úti um allt, meira að segja hér í Úkraínu. Umboðsskrifstofan okkar Iceland Sync Man­agement er á Íslandi og svo erum við með tónlistar- og tæknifyrirtæki í Los Angeles sem heitir Icelandic Record / UNNA,“ segir Steinunn Camilla, önnur af umboðsmönnum Svölu Björgvinsdóttur. Hin er Soffía Jónsdóttir og eru þær verkefnastjórar atriðis Svölu og halda utan um það með fagmannlegum hætti. Fínustu smáatriði fara ekki fram hjá vökulum augum þeirra. Það hefur sést frá því að Fréttablaðið kom til Kænugarðs.

UNNA er verkefni sem þær settu á laggirnar ásamt Dave Stritzinger og Ray Young. Er það gert til að einfalda hinn flókna bakheim tónlistarinnar.

„Við erum að hjálpa höfundum og flytjendum að halda utan um réttindi sín svo þau fái nú örugglega borgað fyrir vinnuna sína. Það eru miklir peningar í umferð sem fólk veit varla af og við erum að hjálpa þeim að finna þá því þeir liggja víða,“ segir Soffía.

Þær stöllur fengu smjörþefinn af Eurovision í fyrra þegar þær héldu utan um atriði Öldu Dísar sem endaði í öðru sæti í forkeppninni á Íslandi. Steinunn segir að þróunin á keppninni sé mjög góð og lagið Paper passi vel inn í þá þróun. „Það eru ekki bara trumbur og þjóðlagadót núna þótt það sé skemmtilegt og geri Eurovision að því sem það er en mér finnst Paper passa vel inn í.“

Eurovision er að verða töffSoffía kemur af miklu söngkyni og segir að Eurovision sé að verða töff og lögin góð. „Keppnin er að verða kúl og lögin alltaf að verða betri þótt flytjendur séu misgóðir. En mér finnst lögin betri eftir því sem árin líða.“

Steinunn tekur undir það og segir að koma Justins Timberlake í fyrra hafi sýnt að Eurovision sé ekki lengur einhver hallærislega skemmtileg hátíð heldur vettvangur fyrir lagahöfunda og söngvara að koma sér á framfæri. „Þetta er orðið mjög stórt með tilkomu samfélagsmiðlanna og þetta verður bara stærra.“

Stór hópur fylgir Svölu út til að allt gangi smurt fyrir sig. Sem verkefnastjórar þurfa þær því að vera á tánum nánast allan sólahringinn. „Við erum hér til að sjá um verkefnið og hópinn og að allir séu að skila sínu,“ segir Soffía. „Og haga sér. Það gengur misvel,“ segir Steinunn og hlær.

„Nei, þetta hefur gengið alveg ljómandi vel enda allir hér atvinnufólk fram í fingurgóma. Þetta er auðvitað svolítið stórt og mikið verkefni en búið að ganga vel.“ Eftir að Eurovision lýkur munu þær stöllur ekki sitja með hendur í skauti því fram undan er áframhaldandi vinna. „Við erum heppnar að gera það sem við erum að gera. Við erum að vinna með góðu fólki, fólki sem vill leggja á sig vinnu, sem skiptir miklu máli.“






Fleiri fréttir

Sjá meira


×