Innlent

Bæjarfulltrúar í níu daga ferð til Kína

Sveinn Arnarsson skrifar
Eiríkrur Björn Björgvinsson fer fyrir hópi 11 manna sendinefndar til Sjanghæ í Kína.
Eiríkrur Björn Björgvinsson fer fyrir hópi 11 manna sendinefndar til Sjanghæ í Kína. vísir/ernir

Hálf bæjarstjórn Akureyrar auk bæjarstjóra, aðstoðarmanns hans og fyrrverandi forseta bæjarstjórnar munu fara í níu daga ferð til Sjanghæ í Kína í lok mánaðarins til að kynnast þar fólki og fyrirtækjum og styrkja tengsl Akureyrarkaupstaðar við bæjarfélagið Lingang í Sjanghæ. Forseti bæjarstjórnar segir þessa ferð geta skipt miklu fyrir bæjarfélagið.

Sendinefnd Akureyrar og tengdra aðila, svo sem fyrirtækja í eigu bæjarins að langstærstum hluta, telur alls ellefu einstaklinga. Munu þau fara utan þann 23. maí og áætluð heimkoma er níu dögum síðar.

„Okkur var boðið á viðburð í Kína og við teljum þetta mikilvæga samkomu fyrir Akureyri og þá starfsemi sem við viljum byggja upp hér varðandi siglingar til að mynda. Einnig verða með í för rektor Háskólans á Akureyri og fyrrverandi forseti Íslands,“ segir Matthías Rögnvaldsson, forseti bæjarstjórnar Akureyrar.

Allir bæjarfulltrúar L-listans fara í ferðina, tveir frá Sjálfstæðisflokki og einn frá Samfylkingu. Að auki fer framkvæmdastjóri Atvinnuþróunarfélags Eyjafjarðar, framkvæmdastjóri og stjórnarformaður Norðurorku auk bæjarstjóra ásamt aðstoðarmanni.

Af þessum ellefu einstaklingum eru þrjár konur sem fara í ferðina. Matthías segir ferðina munu kosta um 200 þúsund á hvern einstakling, ferðalag frá Akureyri til Kína. Kostnaður er allur greiddur af Akureyrarbæ og tengdum fyrirtækjum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira