Formúla 1

Alonso: Sjöunda sæti er eins og gjöf í dag

Kristinn Ásgeir Gylfason skrifar
Sebastian Vettel, Lewis Hamilton og Valtteri Bottas.
Sebastian Vettel, Lewis Hamilton og Valtteri Bottas. Vísir/Getty

Lewis Hamilton náði ráspól fyrir spænska kappaksturinn sem fram fer á morgun eftir afar spennandi tímatöku. Fernando Alonso kom einna helst á óvart með sjöunda sætinu. Hver sagði hvað eftir tímatökuna?

„Síðasti hringurinn var ágætur en ég gat raunverulega heyrt í áhorfendum hvetja mig áfram. Það er alltaf gott að fá slíkan stuðning. Áhorfendur gera þessa helgi að því sem hún er,“ sagði Hamilton.

„Ég er hræddur um að þessi litlu mistök sem ég gerði þegar ég læsti inn í síðustu beygju hafi verið það sem skyldi á milli. Morguninn var erilsamur, það þurfti að skipta um vél í bílnum. Eins vil ég þakka liðinu í bílskúrnum og líka þeim sem komu frá hinni hlið bílskúrsins til að hjálpa,“ sagði Sebastian Vettel sem varð annar í dag.

„Það er alltaf gott að ræsa frá annarri röðinni. Ég verð að segja að liðið stóð sig mjög vel við að skipta um vél í bílnum í morgun,“ sagði Valtteri Bottas sem ræsir þriðji á morgun.

„Sjöunda sæti á ráslínu er eins og gjöf í dag. Ég veit ekki hvernig dagurinn verður á morgun, það er erfitt að taka fram úr hérna og það gæti þýtt að við náum að halda sætinu,“ sagði heimamaðurinn Alonso sem varð sjöundi á McLaren bílnum.

Max Verstappen var nokkuð sáttur við sinn hlut í dag. Vísir/Getty

„Svona á þetta að vera, keppnin verður spennandi á morgun. Valtteri vantaði bara æfinguna í morgun. Hann hefði verið nálægt Lewis hefði hann fengið tíma í morgun,“ sagði Toto Wolff, liðsstjóri Mercedes.

„Fernando gerði þetta. Hann er á heimavelli og það má aldrei gefast upp. Kannski ég fari að spila tennis í kvöld, það virðist færa okkur lukku. Við viljum bara halda stöðunni á morgun eða bæta hana,“ sagði Zak Brown, stjórnandi McLaren liðsins.

Hann vísaði til þess að Alonso yfirgaf fyrri æfinguna í gær eftir bilun á fyrsta hring og var byrjaður að spila tennis innan skamms.

„Ég er sáttur við fimmta sætið. Við áttum ekki möguleika á að enda ofar en það. Ég er hrifinn af þessari braut. Við verðum að taka það sem kemur,“ sagði Max Verstappen sem varð fimmti á Red Bull.

„Miðað við allt þá er ég nokkuð sáttur, við komum ekki hingað með væntingar um ráspól. Við gerum okkur ráð fyrir því að aðrir ná framförum líka. Við erum um sekúndu á eftir fremstu mönnum,“ sagði Daniel Ricciardo sem varð sjötti á Red Bull.


Tengdar fréttir

Lewis Hamilton ræsir fremstur á Spáni

Lewis Hamilton náði í ráspól í tímatökunni fyrir spænska kappaksturinn. Sebastian Vettel á Ferrari varð annar og Valtteri Bottas varð þriðji.

Lewis Hamilton fljótastur á föstudagsæfingum

Lewis Hamilton á Mercedes var fljótastur á báðum æfngum dagsins sem fram fóru á Katalóníubrautinni á Spáni. Valtteri Bottas á Mercedes varð annar á báðum æfingum.




Fleiri fréttir

Sjá meira