Handbolti

Yfirgnæfandi líkur á fjölgun liða: Stjarnan og Víkingur næstu lið inn

Tómas Þór Þórðarson skrifar
Ágúst Jóhannsson féll sem þjálfari Víkings en vann svo Víking í umspilinu sem þjálfari KR en sér svo mögulega á eftir Víkingi í efstu deild.
Ágúst Jóhannsson féll sem þjálfari Víkings en vann svo Víking í umspilinu sem þjálfari KR en sér svo mögulega á eftir Víkingi í efstu deild. vísir/stefán
Handboltalið Víkings gæti átt von á góðum fréttum í dag þegar skráningarfrestur vegna þátttöku á Íslandsmótinu rennur út og deildaskipting verður í kjölfarið gefin út.

Víkingar eiga nefnilega von á sæti í úrvalsdeildinni fari svo að fjölgað verði í deildinni upp í tólf lið eins og allt stefnir í miðað við fjölda liða sem hafa skráð sig til leiks. Þetta segir Róbert Geir Gíslason, framkvæmdastjóri Handknattleikssambands Íslands, í samtali við Fréttablaðið.

„Við gefum ekkert út um fjölda liða í deildunum fyrr en skráningarfresti lýkur en við reiknum með fjölgun liða í efstu deild. Það eru yfirgnæfandi líkur á því. Það stefnir í að það verði í heildina fleiri lið sem keppa á næsta tímabili heldur en á því síðasta þrátt fyrir að KR hafi ákveðið að draga sitt lið úr keppni,“ segir Róbert Geir.

Eiga ekki sætið

Miklar deilur hafa verið innan KR um helgina eftir að ákveðið var að senda meistaraflokk félagsins ekki til leiks næsta vetur. KR-ingar komu öllum á óvart og unnu Víkinga í undanúrslitum umspils 1. deildar og voru þannig með sæti víst í efstu deild á næstu leiktíð ef svo færi að fjölgað yrði í deildinni sem allt stefnir í.

Aðalstjórn KR, ásamt stjórn handknattleiksdeildar, komst að þeirri niðurstöðu að senda liðið ekki til þátttöku sem gerði marga KR-inga mjög reiða. KR hefði með fjölgun spilað á meðal þeirra bestu á næstu leiktíð en umræðan segir Róbert að hafi verið á villigötum því Vesturbæingar séu ekki að gefa eftir úrvalsdeildarsæti. Ekki sé hægt að gefa frá sér eitthvað sem lið á ekki.

„Umræðan hefur verið á rangri braut. KR er 1. deildar lið enn þá alveg eins og það var í vetur. Stjarnan er líka 1. deildar lið því það hafnaði í níunda sæti efstu deildar og féll. Stjarnan heldur bara sæti sínu ef það er fjölgað. KR hefði farið upp ef fjölgað væri en það getur ekki gefið eftir sæti sem það á ekki,“ segir Róbert Geir.

Reglurnar skýrar

Þar sem allt stefnir í að fjölgað verði í tólf liða efstu deild þarf að bæta við einu liði. Akureyri Handboltafélag lenti í neðsta sæti og féll og á ekki rétt á sæti í efstu deild hvort sem liðið heldur því nafni eða skiptir sér upp í KA og Þór á ný.

Þórsarar eru reyndar búnir að hafna slitum KA og á eftir að koma í ljós hvað verður fyrir norðan. Ekkert af þessum þremur félögum, ef þannig má að orði komast, verður í efstu deild á næsta ári heldur eru það Víkingar sem bíða spenntir.

„KR ákvað að skrá sig ekki til leiks en það var fyrsta liðið til að taka laust sæti í efstu deild sem það lið sem tapaði í úrslitum umspils 1. deildar á móti ÍR,“ segir Róbert er hann útskýrir reglurnar. Hann segir þær mjög skýrar.



„Á eftir liðinu sem tapar í umspilinu kemur liðið sem hafnaði í níunda sæti efstu deildar sem er Stjarnan og þannig heldur hún sæti sínu en þá á enn þá eftir að bæta við liði þar sem allt stefnir í fjölgun og KR skráir sig ekki til leiks. Þriðja liðið er það lið sem hafnaði efst í deildarkeppninni í 1. deild af þeim liðum sem eru ekki komin upp nú þegar og ætla að skrá sig til leiks. Það eru Víkingar,“ segir Róbert Geir.

Gætu orðið þrjár deildir

Ekki nóg með að loksins sé aftur verið að fjölga í tólf liða efstu deild sem margir hafa beðið spenntir eftir þá er áhuginn svo mikill í handboltanum að þrjár deildir eru mjög raunhæfur möguleiki.

„Við gefum út deildaskiptinguna á morgun eftir að við setjumst yfir þetta með mótanefnd. Það voru 24 lið sem kepptu á síðasta tímabili í karlaboltanum en nú gætu þau orðið 27. Það eru fleiri U-lið að skrá sig og svo gæti Hvíti Riddarinn komið inn í þetta,“ segir Róbert og heldur áfram:

„Fari svo að 27 lið skrái sig til leiks verðum við með tólf liða efstu deild, átta liða 1. deild og restin, sjö plús lið, spila í 2. deild. Mesta flækjustigið verður ef það verður spilað í þremur deildum. Þá gæti frestun á útgáfu deildafyrirkomulagsins eitthvað frestast annars verður þetta allt klárt á morgun,“ segir Róbert Geir Gíslason. tomas@365.is


Tengdar fréttir

KR leggur handboltaliðið niður

KR spilar ekki í Olís-deild karla í handbolta á næsta tímabili þrátt fyrir að hafa unnið sér sæti í deildinni nú í vor.




Fleiri fréttir

Sjá meira


×