Golf

Guðmundur Ágúst fær að keppa við Henrik Stenson á Nordea Masters

Óskar Ófeigur Jónsson skrifar
Guðmundur Ágúst Kristjánsson.
Guðmundur Ágúst Kristjánsson. Mynd/GSÍ

Guðmundur Ágúst Kristjánsson sýndi styrk sinn á úrtökumóti fyrir Nordea Masters og tryggði sér þátttökurétt á sjálfu Nordea Masters sem er hluti af sterkustu mótaröð Evrópu.

Guðmundur Ágúst varð í öðru sæti á úrtökumótinu fyrir Nordea Masters en hann lék á fimm höggum undir pari á Barsebäck golfvellinum sem er rétt utan við Malmö í Svíþjóð.

Með árangri sínum náði atvinnukylfingurinn úr GR að tryggja sér keppnisrétt á sjálfu Nordea Masters sem er hluti af sterkustu mótaröð Evrópu.

Guðmundur Ágúst lék á 68 höggum á þessum par 73 velli. Hann fékk sex fugla og einn skolla. Fjórir fuglanna komu á par 4 holu en tveir þeirra komu á par 5 holu. Skollinn var síðan á par 4 holu.

Mótið fer fram 1.-4. júní á Barsebäck og þar mæta til leiks margir af bestu kylfingum heims. Enska ungstirnið Matthew Fitzpatrick hefur titil að verja á mótinu.

Alls reyndu 124 kylfingar sig á úrtökumótinu en alls komust þrír áfram. Adrien Bernadet og Niklas Lemke öðluðust keppnisrétt líkt og Guðmundur Ágúst. Þar mæta til leiks kylfingar á borð við heimamennina Henrik Stenson og Alexander Noren.

Andri Þór Björnsson (GR), Axel Bóasson (GK) og Haraldur Franklín Magnús (GR) komust ekki áfram.  Andri lék á einu höggi undir pari, Axel á +2 og Haraldur á +4.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira