Bílar

Hækkun hámarkshraða víða í Bandaríkjunum

Finnur Thorlacius skrifar
Starfsmenn skipta um skilti sem greina frá hámarkshraða í Nevada.
Starfsmenn skipta um skilti sem greina frá hámarkshraða í Nevada.

Á undanförnum mánuðum hefur mikið borið á fréttum um hækkaðan hámarkshraða á þjóðvegum í Bandaríkjunum. Kannanir hafa sýnt að hækkaður hámarkshraði hefur fremur orðið til þess að fækka slysum en fjölga þeim og víst er að í leiðinni komast vegfarendur um þá hraðar á milli staða og leiðist minna við aksturinn.

Kannanir hafa einnig sýnt að á þeim stöðum þar sem hámarkshraði er mjög lágur leiðist ökumönnum svo við aksturinn að athyglin minnkar og meiri hætta er á að ökumenn sofni. Víst er að víða er fallegt í Bandaríkjunum, en einnig er víða afar fábreytt landslag þar sem draumur ökumannsins er helst sá að komast sem hraðast yfir.

Þar sem það hefur verið metið öruggt hefur hámarkshraði gjarna verið hækkaður. Nýlega var hámarkshraði hækkaður úr 75 í 80 mílur á 210 kílómetra kafla norðaustan við Reno í Nevada og á myndinni má sjá vegagerðarmenn skipta um skilti sem greinir frá hámarkshraða þar.

Þar mega ökumenn nú aka í hátt í 130 km hraða, en einmitt þann hraða má einmitt víða sjá á hraðbrautum í mörgum löndum Evrópu. Nevada bætist með þessu í hóp Idaho, Montana, S-Dakota, Texas, Utah og Wyoming, sem nýlega hafa hækkað hámarkshraða á þeim þjóðvegum sem öruggir teljast.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira