Viðskipti innlent

Birtíngur segir Pressuna ekki færa um að standa við skuldbindingar sínar

Sunna Karen Sigurþórsdóttir skrifar
Björn Ingi Hrafnsson sendi starfsfólki sínu bréf í gær þar sem hann tilkynnti um riftunina.
Björn Ingi Hrafnsson sendi starfsfólki sínu bréf í gær þar sem hann tilkynnti um riftunina.

„Forsendur kaupanna voru brostnar og Pressan ehf. ekki fær um að standa við skuldbindingar sínar líkt og fram kemur í samkomulaginu,“ segir Karl Steinar Óskarsson, framkvæmdastjóri Birtíngs útgáfufélags, í yfirlýsingu til fjölmiðla.

Greint var frá því í gær að samningum um kaup Pressunnar á öllu hlutafé í Birtíngi hafi verið rift. Samkvæmt bréfi sem Björn Ingi Hrafnsson, stjórnarformaður og eigandi Pressunnar, sendi starfsfólki í gær var samkomulaginu rift til þess að lækka heildarskuldir félagsins.

Karl Steinar segir í tilkynningunni að samkomulag um riftun hafi verið undirritað af hálfu allra hlutaðeigandi aðila 10.maí síðastliðinn. Greiðsla inn á kaupverðið hafi á sínum tíma komið frá þriðja aðila vegna vanefnda Pressunnar og að í samningi um riftun felist að sú greiða verði gerði upp með samkomulagi við þann aðila.

„Samkomulag hefur þegar náðst um þá greiðslu og er Pressunni ehf. óviðkomandi eftir undirritun samkomulagsins líkt og þar er staðfest. Í samkomulaginu segir einnig að hvorugur aðilinn skuldi hinum fjármuni eftir undirritun þess. Þá er rétt að undirstrika að Birtíngur ehf. skuldar enga fjármuni til Pressunnar ehf. vegna rekstrar heldur skuldar Pressan ehf. Birtíngi ehf. verulega fjármuni,“ segir í tilkynningunni.



Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira