Veiði

Staðbundni urriðinn í Ytri Rangá í sókn

Karl Lúðvíksson skrifar
Eiríkur með urriðann úr Ytri Rangá
Eiríkur með urriðann úr Ytri Rangá Mynd: West Ranga FB

Það vissu kannski ekki allir að Ytri Rangá er ekki aðeins  öflug laxveiðiá en í henni er staðbundinn urriði og sjóbirtingur.

Eins og veiðimenn vita er laxveiði haldið uppi með öflugum seiðasleppingum í Rangánum en urriðastofninn sem er í ánni er aftur á móti frumbyggi í ánni og þrífst vel.  Það hefur reyndar verið mjög algengt að fá sjóbirting á neðri svæðunum í ánni og voru veiðimenn á tímabili hvattir til að drepa hann en síðustu ár hefur aftur á móti dæmið snúst við og veiðimenn hvattir til að sleppa honum.  Það veldur því að nú veiðist reglulega stór sjóbirtingur á svæðinu.

Staðbundni urriðinn sem aftur á móti gengur ekki til sjávar hefur alltaf veiðst mest fyrir ofan Árbæjarfoss og langt upp á heiði en síðustu tvö ár hafa fleiri fiskar veiðst þar fyrir neðan.  Það er þó nokkuð af þessum stóra urriða í ánni og það þarf smá tíma til að læra á legustaðina en þegar veiðimenn hafa náð góðum tökum á því hvar fiskurinn liggur og hvernig má nálgast hann er hægt að gera feyknaveiði á stórum og flottum urriða.

Bjarki Már Jóhannsson og Eiríkur Stefánsson leiðsögumenn við Ytri Rangá náðu einum stórum urriða í Húsabakka fyrir tveimur dögum og eins og sést á myndinni er þetta vel haldinn staðbundinn urriði sem vantaði ekki mikið uppá 90 sm.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira