Lífið

Söngelsk systkini með þriðju sumartónleikana

Stefán Þór Hjartarson skrifar
Kristín og Guðfinnur munu brátt bæði nema söng í Vínarborg. Kristín er búsett þar en Guðfinnur flytur í haust.
Kristín og Guðfinnur munu brátt bæði nema söng í Vínarborg. Kristín er búsett þar en Guðfinnur flytur í haust. Vísir/Ernir

„Við erum að halda okkar þriðju Systkinatónleika. Okkur langaði að gera þetta að árlegum viðburði og það hefur gengið mjög vel. Það er búið að vera uppselt öll síðustu ár, en þetta hefur alltaf verið í Hannesarholti hingað til. Nú erum við aðeins að stækka við okkur og erum búin að færa okkur yfir í Fella- og Hólakirkju,“ segir Guðfinnur Sveinsson en hann og systir hans, Kristín Sveinsdóttir, standa fyrir árlegum Systkinatónleikum sem fara nú fram í þriðja sinn á sumardaginn fyrsta.

„Kristín er búin að syngja síðan hún var lítil, fjögurra eða fimm ára. Ég er hins vegar tiltölulega nýbyrjaður – byrjaði að læra fyrir þremur og hálfu eða fjórum árum. Þegar ég var að byrja að koma mér áfram í söngnum eftir að ég byrjaði í náminu þá fór þetta í gang hjá okkur,“ segir Guðfinnur en hann hefur næsta haust söngnám í Vín, en þar í borg nemur Kristín einmitt líka söng um þessar mundir. Hún lauk nýlega við uppsetningu Töfraflautunnar á La Scala, þannig að fyrir utan að selja upp á árlega tónleika sína er nóg annað að gera hjá þessum söngelsku systkinum.

„Konseptið er að fá alltaf ungt tónskáld með okkur á hverju ári til að semja dúett handa okkur, okkur finnst það æðislega gaman. Við blöndum þá alltaf einu nýju verki við íslensk ljóð, erlendum ljóðum, dúettum og aríum. Í ár er það Hreiðar Ingi Þorsteinsson sem er með okkur og er að semja rosalega flott verk fyrir okkur fyrir tvo einsöngvara og kammerkór – það verður sextán manna kór með okkur.“
Með þeim verður fyrir utan kammerkórinn, sem samanstendur af gömlum söngfélögum Guðfinns og Kristínar úr kór Langholtskirkju, Kristinn Örn Kristinsson píanóleikari.

Meðal þeirra verka sem þau systkinin flytja eru lög eftir Jón Ásgeirsson, Ingibjörgu Þorbergs, Brahms, Schubert, Wolf, Donizetti og Mozart. Síðan er það auðvitað hápunktur kvöldsins þegar þau frumflytja spánnýtt verk eftir Hreiðar Inga.

Almennt miðaverð á tónleikana er 2.000 krónur og það er kannski ekki vitlaust að tryggja sér miða í tíma því að síðustu ár hefur víst hreinlega þurft að vísa fólki frá.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira