Innlent

Skólahald leggst af á Borðeyri næsta haust

Sveinn Arnarsson skrifar
Öllum börnum í Hrútafirði verður ekið í skóla til Hvammstanga næsta haust.
Öllum börnum í Hrútafirði verður ekið í skóla til Hvammstanga næsta haust. vísir/pjetur

Skólahaldi verður ekki framhaldið á Borðeyri við Hrútafjörð á næsta skólaári. Börnum hefur fækkað svo mjög í gamla Bæjarhreppi að ekki er talið hægt að halda úti skólastarfi á Borðeyri.

Þrettán íbúar eru með lögheimili á Borðeyri í dag en öllu fleiri í sveitunum í kring. Guðný Hrund Karlsdóttir, sveitarstjóri Húnaþings vestra, segir bæjarfélagið hafa hringt í foreldra á svæðinu og hlustað á íbúa.

Kristín Ólöf Þórarinsdóttir, aðstoðarskólastjóri grunnskóla Húnaþings vestra, segir börnum hafa fækkað mjög. „Þegar ég sótti þennan skóla á síðustu öld voru um þrjátíu börn í skólanum. Nú er hins vegar gert ráð fyrir að þrjú börn verði í skólanum á næsta skólaári,“ segir Kristín Ólöf.

Á sama tíma mun leikskólinn á Borðeyri, Ásgarður, leggjast af á næsta skólaári. Ein starfsstöð leikskóla og grunnskóla verður því starfandi á næsta skólaári, á Hvammstanga. Verður börnum ekið þangað.

„Eindreginn vilji byggðarráðs og sveitarstjórnar hefur verið til þess að halda úti skólastarfi á Borðeyri eins lengi og þess er nokkur kostur,“ segir í bókun byggðarráðs sveitarfélagsins. „Með fækkun nemenda er hins vegar komin upp breytt staða ef horft er til meðal annars félagslegra og faglegra sjónarmiða.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira