Innlent

Óttast ekki að missa Granda á Akranes

Sveinn Arnarsson skrifar
HB Grandi hefur gefið út að ytri þættir stýri því að vinnsla verði ekki á báðum stöðum.
HB Grandi hefur gefið út að ytri þættir stýri því að vinnsla verði ekki á báðum stöðum. Fréttablaðið/AntonBrink
Dagur B. Eggertsson borgarstjóri óttast ekki að milljarða uppbygging hafnarmannvirkja á Akranesi þýði að störf flytjist frá HB Granda í Reykjavík upp á Akranes. Forstjóri HB Granda hefur útilokað að fyrirtækið haldi áfram bolfiskvinnslu á báðum stöðunum.

„Nei, ég óttast það ekki að HB Grandi fari upp á Akranes. Það er mjög mikilvægt að hafnsækin starfsemi verði áfram í borginni,“ segir Dagur.

Faxaflóahafnir, Akranes og HB Grandi eiga nú í viðræðum um uppbyggingu hafnarmannvirkja sem kosta á annan milljarð króna sem alfarið verður greitt af Faxaflóahöfnum. Reykvíkingar eiga um 75 prósent af  Faxaflóahöfnum,. Til að af uppbyggingunni verður þurfa allir aðilar að samþykkja hana og tryggingu fyrir áframhaldandi starfsemi HB Granda á Skaganum.

Vilhjálmur Vilhjálmsson, forstjóri HB Granda, hefur sagt útilokað að fyrirtækið verði á báðum stöðum með vinnslu. Það sé vegna ytri þátta og hafnarframkvæmdir skipti þannig engu máli.

Dagur B Eggertsson, formaður stjórnar Faxaflóahafna
„Áform um uppbyggingu hafnarmannvirkja á Akranesi eiga sér langa sögu og þessar hugmyndir eru ekki að verða til núna. Allt frá árinu 2007 hefur verið markmið að byggja upp hafnarmannvirki á Akranesi fyrir hafnsækna starfsemi,“ segir Dagur sem er formaður stjórnar Faxaflóahafna. „Viðræður eru í ágætum og eðlilegum farvegi.“

Marta Guðjónsdóttir, borgarfulltrúi Sjálfstæðisflokksins í Reykjavík og stjórnarmaður í Faxaflóahöfnum, segir af og frá að uppbygging hafnarmannvirkja á Akranesi upp á tæpa tvo milljarða feli í sér að HB Grandi hverfi frá Reykjavík. Verkefnið sé arðbært hvort sem HB Grandi ætli sér að vera á Akranesi eða ekki.

„Ég horfi ekki þannig á verkefnið og samþykkti uppbygginguna ekki á þeim forsendum,“ segir Marta. „Það er markmið Faxaflóahafna að byggja upp alla okkar hafnaraðstöðu. Við gætum séð ný fyrirtæki nýta sér höfnina á Akranesi. Ég legg mikla áherslu á að HB Grandi verði enn með starfsemi í Reykjavík,“ bætir Marta við.




Fleiri fréttir

Sjá meira


×