Innlent

Telur að bensínstöðvum muni fækka verulega á næstu árum

Höskuldur Kári Schram skrifar
Runólfur Ólafsson, framkvæmdastjóri FÍB.
Runólfur Ólafsson, framkvæmdastjóri FÍB. Vísir/Auðunn
Framkvæmdastjóri Félags íslenskra bifreiðaeigenda telur að kaup Haga á olíufyrirtækinu Olís muni leiða til aukinnar samkeppni á eldsneytismarkaði og að bensínstöðvum á höfuðborgarsvæðinu muni fækka verulega á næstu misserum. Hlutabréf í Högum hækkuðu um nærri sex prósent á mörkuðum í dag.

Tilkynnt var um kaupin í gær en kaupverð hlutafjár í Olís nemur 9,2 milljörðum króna. Kaupverð verður greitt annars vegar með hlutafé í Högum og hins vegar með reiðufé. Í tilkynningu til Kauphallarinnar segir að sá hluti kaupverðsins sem greiddur er með reiðufé verði að hluta til fjármagnaður með öflun lánsfjár. Kaupsamningurinn er gerður með fyrirvara um samþykki hluthafa og Samkeppniseftirlitsins.

Flestir líta svo á að með kaupunum séu Hagar að búa sig undir samkeppni við bandarísku verslunarkeðjuna Costco sem ætlar að opna bensínstöð við verslun sína í Garðabæ.

Runólfur Ólafsson framkvæmdastjóri FÍB segir viðbúið að þetta muni leiða til aukinnar samkeppni á eldsneytismarkaði.

„Ég hef trú á því að innkoma Costco muni auka samkeppni á markaðinum og nú eru fyrirtæki á markaði að bregðast við og við fögnum því,“segir Runólfur.

Festi, sem rekur Krónuna, er líka með þau áform að koma upp bensíndælum við sínar verslanir en borgaryfirvöld hafa hins vegar ekki gefið grænt ljós á þær framkvæmdir. Í dag eru um 250 bensínstöðvar á landinu en Runólfur telur viðbúið að þeim fækki verulega á næstu árum.

„Í núverandi álagningarumhverfi þá hafa félögin getað leyft sér að halda úti alltof stóru bensínstöðvaneti og samt haft hagnað af því. Nú geri ég ráð fyrir því að á næstu misserum munum við sjá verulega fækkun, sérstaklega hérna á höfuðborgarsvæðin, á eldsneytisstöðvum,“ segir Runólfur.




Fleiri fréttir

Sjá meira


×