Innlent

Ekkert eyðslufyllerí fram undan

Snærós Sindradóttir skrifar
Afkoma A- hluta Reykjavíkurborgar er jákvæð um 2,6 milljarða króna. Það nægir þó ekki fyrir skuldum og nýframkvæmdum.
Afkoma A- hluta Reykjavíkurborgar er jákvæð um 2,6 milljarða króna. Það nægir þó ekki fyrir skuldum og nýframkvæmdum. vísir/gva
„Þetta er ekki nóg til að borga af lánum og nýfjárfestingum. Það þarf að taka um þriggja milljarða króna lán að auki,“ segir Halldór Halldórsson, borgarfulltrúi Sjálfstæðismanna, um rekstur Reykjavíkurborgar. Ársreikningur borgarinnar var kynntur í gær en þar kemur fram að samtals skilar borgin jákvæðum rekstri upp á 26,5 milljarða króna.

Rekstri Reykjavíkurborgar er skipt í A- og B-hluta. A-hlutinn fjármagnar alla grunnþjónustu borgarinnar með skatttekjum. B-hlutinn hýsir fyrirtæki borgarinnar en sum þeirra greiða Reykjavíkurborg arð. Það sem útskýrir mikla tekjuaukningu þar er til að mynda gífurleg hækkun fasteignaverðs á þeim um það bil 2.000 eignum sem Félagsbústaðir eiga. Mismunurinn reiknast sem hagnaður.

Halldór Halldórsson, borgarfulltrúi Sjálfstæðisflokks.vísir/pjetur
Rekstrarniðurstaða A-hlutans er aftur á móti jákvæð um 2,6 milljarða króna. Tekjurnar hafa aukist vegna hærri fasteignagjalda og hærri launa íbúa sem skilar sér í hærra útsvari til borgarinnar. En 2,6 milljarðar króna nægja ekki til að stórauka fjárframlög til grunnþjónustu eða snúa stöðunni við.

„Það stefnir í að skuldir haldi áfram að aukast til 2020, því 2,6 milljarðar er ekki nóg til að borga afborganir lána og ráðast í nýframkvæmdir,“ segir Halldór.

Líf Magneudóttir, borgarfulltrúi Vinstri grænna, segir að því miður sé afgangurinn ekki nægur til að taka til hendinni í borginni. „Við erum að minnsta kosti ekki að fara að byggja vatnagarð eða vísindasafn. En það gefst smá svigrúm til að auka þjónustuna. Þetta þýðir að það er meiri peningur í það sem þarf að bæta.“

Guðfinna Jóhanna Guðmundsdóttir, borgarfulltrúi Framsóknar og flugvallarvina.vísir/anton brink
Líf segir að aukinn afgangur komi þó ekki einungis til vegna bókhaldshagnaðar. Stefna meirihlutans skipti þar líka miklu máli. „Við höfum sýnt ráðdeild og sparað við okkur. Það er ástæðan fyrir því að við erum að skila afgangi.“

Hún segir samt mikilvægt að halda aðhaldinu áfram. „Við sýnum áfram ráðdeild og aðhald. Mér finnst persónulega of mikið sáldrast út og við þurfum að rýna betur í hverja krónu sem við eyðum og átta okkur á hvort það séu raunverulega peningarnir sem auka þjónustuna eða hvort það sé eitthvað annað sem mun gera það.“

Guðfinna Jóhanna Guðmundsdóttir, fulltrúi Framsóknar og flugvallarvina, segir jákvætt að niðurstaðan sé mun betri en verið hefur undanfarin ár. „Nú er komið að þeim tímapunkti að við þurfum að sinna viðhaldi á eignum borgarinnar. Niðurstaðan þýðir að það er meira svigrúm. Vonandi getum við farið að auka fjármagnið inn í þessa liði grunnþjónustunnar sem eru fyrst og fremst velferðarmálin og menntamálin. En ef við vanrækjum viðhaldið þá verður það alltaf dýrara þegar upp er staðið.“

Hún segir að svigrúmið sem skapist þurfi því að fara í viðhald og velferð. „Við verðum að minnka biðlistana eftir félagslegum úrræðum meira en við höfum getað gert.“ 




Fleiri fréttir

Sjá meira


×