Viðskipti erlent

Vill óhræddu stúlkuna burt

Hulda Hólmkelsdóttir skrifar
Styttunni er ætlað að minna fyrirtæki á að auka vægi kvenna í stjórnum þeirra.
Styttunni er ætlað að minna fyrirtæki á að auka vægi kvenna í stjórnum þeirra. Vísir/Getty

Arturo Di Modica, listamaðurinn sem hannaði hið fræga naut Wall Street hefur krafist þess að stytta af lítilli stúlku, sem staðið hefur á móti nautinu frá 8. mars síðastliðnum, verði fjarlægð.

Styttan af stúlkunni heitir Óhrædda stúlkan og er eftir listakonuna Kristen Visbal. Á merkingu fyrir framan hana stendur „Þekktu máttinn af konum í forystu“ og „hún skiptir máli.“ Styttunni var komið fyrir í tilefni af alþjóðlegum baráttudegi kvenna og fyrst stóð til að hún fengi að standa í einn mánuð.

Borgaryfirvöld í New York hafa nú hins vegar gefið leyfi fyrir því að styttan standi út febrúar árið 2018.

Norman Siegel, lögfræðingur Di Modica, segir að staðsetning stúlkunnar brjóti höfundarréttarlög og hefur krafist þess að styttan verði færð.

„Við erum ekki að segja að hún þurfi að vera færð út fyrir borgina. Hún þarf bara að vera staðsett annars staðar,“ segir Siegel.

Styttan af litlu stúlkunni hefur orðið vinsæl meðal ferðamanna í borginni síðan hún var reist en henni er ætlað að minna fyrirtæki á að auka vægi kvenna í stjórnum þeirra. Styttunni af nautinu var komið fyrir í skjóli nætur árið 1989 og átti það aða vera tákn um styrk New York borgar eftir verðbréfahrun ársins 1987.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira