Formúla 1

Sebastian Vettel vann í Barein

Kristinn Ásgeir Gylfason skrifar
Sebastian Vettel á Ferrari vann keppnina í Barein.
Sebastian Vettel á Ferrari vann keppnina í Barein. Vísir/Getty

Sebastian Vettel á Ferrari kom fyrstur í mark í Barein í dag. Lewis Hamilton á Mercedes varð annar og Valtteri Bottas á Mercedes varð þriðji.

Vettel nær sér með þessu í sjö stiga forskot í heimsmeistararkeppni ökumanna. Spennan magnast í Formúlunni þetta tímabilið.

Bottas hélt forystunni í ræsingunni en Vettel vann sig fram úr Lewis Hamilton. Kimi Raikkonen tapaði tveimur sætum í ræsingunni. Vettel hóf þegar að pressa á Bottas.

Vettel kom inn á þjónustusvæðið á 11. hring og tók ofur-mjúk dekk undir, með það fyrir augum að ná að setja hraða hringi til að ná fram úr Bottas þegar hann tæki þjónustuhlé.

Max Verstappen fór stjórnlaust beint út af og á varnarvegg á 12. hring. Hann sagði að bremsurnar hafi bilað.

Öryggisbíllinn var kallaður út á brautina á 13. hring þegar Lance Stroll á Williams og Carlos Sainz á Toro Rosso lentu í samstuði. Vettel tók forystuna þegar aðrir fremstu menn tóku þjónustuhlé undir öryggisbílnum. Vettel hóf svo að auka forskot sitt og var kominn með tveggja sekúndna forskot á Bottas í öðru sæti, skömmu eftir að öryggisbíllinn fór inn.

Valtteri Bottas á Mercedes tókst ekki snúa sínum fyrsta ráspól upp í sigur í dag. Vísir/Getty

Hamilton fékk fimm sekúndna refsingu fyrir að hægja að óþörfu á Daniel Ricciardo þegar báðir voru á leiðinni inn á þjónustusvæðið þegar öryggisbíllinn kom út.

Hamilton komst fram úr Bottas á 27. hring eftir að hafa verið hraðari en Bottas töluvert lengi. Hamilton átti að sækja á Vettel og var að því er virðist hleypt fram úr liðsfélaga sínum, Bottas.

Vettel tók þjónustuhlé á 33. hring og kom út um fimm sekúndum á undan Bottas sem hafði einnig tekið annað þjónustuhlé. Hamilton tók svo þjónustuhlé á 41. hring og tók annan gang af mjúkum dekkjum undir. Mercedes bílnum vegnar betur á þeim heldur en ofur-mjúku dekkjunum.

Hamilton sótti hratt að Bottas og tók um eina og hálfa sekúndu af forskoti liðsfélaga síns eftir að hann tók þjónustuhlé. Hamilton tók svo fram úr Bottas á 47. hring. Hamilton hóf þá eltingaleikinn við Vettel sem hafði um 12 sekúndur í forskot.

Hamilton keyrði ansi grimmt og reyndi hvað hann gat til að saxa niður forskot Vettel, en allt kom fyrir ekki og þegar tveir hringir voru eftir virtist Hamilton slá af í eltingaleiknum.

Hér að neðan má sjá öll helstu úrslit helgarinnar á gagnvirku brautarkorti.


Tengdar fréttir

Valtteri Bottas á ráspól í Barein

Valtteri Bottas á Mercedes náði í sinn fyrsta ráspól í Formúlu 1 í Barein í dag. Lewis Hamilton á Mercedes varð annar og Sebastian Vettel varð þriðji á Ferrari.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira