Viðskipti innlent

Röng mynd af Hvolpasveitartrukki vakti von hjá móður í Vesturbænum

Kolbeinn Tumi Daðason skrifar
Hvolpasveitartrukkurinn sem móðirin hugðist kaupa fyrir son sinn.
Hvolpasveitartrukkurinn sem móðirin hugðist kaupa fyrir son sinn. Vísir

Glögg móðir í gjafahugleiðingum fyrir son sinn tók eftir því þegar hún fletti blöðunum í morgun að Hvolpasveitartrukkur var auglýstur til sölu í Nettó á mun lægra verði en í Toys R Us þar sem hún hefur haft augastað á gripnum.

Ástæðan er sú að sonur hennar ungur er mikill áhugamaður um hvolpana. Auglýsingin er í tilefni Sumardagsins fyrsta og er trukkurinn auglýstur á 6305 krónur í Nettó með afslætti en hefðbundið verð er 6998 krónur. Trukkurinn kostar 14990 krónur í Toys R Us.

Því miður, fyrir mömmuna sem hafði fundið hina fullkomnu Sumardagsgjöf á viðráðanlegu verði, reyndist um mistök að ræða. Hallur Geir Heiðarsson, rekstarstjóri Nettó, athugaði málið eftir fyrirspurn Vísis um hinn mikla verðmun og í ljós kom að mynd af röngum trukki hafði verið settur á auglýsinguna. Sá sem er á myndinni hefur ekki verið til sölu hjá Nettó síðan í desember. 

Um mannleg mistök sé að ræða og hefur starfsfólk í verslunum Nettó verið upplýst um málið að sögn Halls.

Sem fyrr segir kostar trukkurinn 14990 krónur í Toys R Us á Íslandi en er aðeins ódýrari á hinum Norðurlöndunum, kostar í kringum 13000 krónur. Í Bandaríkjunum er verðið á trukknum hins vegar mun lægra eða um 6000 krónur.

Óhætt er að segja að miklar tilfinningar geti verið í spilunum þegar heimilisvinurinn Hvolpasveitin er annars vegar. Er skemmst að minnast þess þegar umsjónarmaður Morgunútvarpsins baðst afsökunar á ummælum sínum í þættinum þess efnis að þættirnir væru leiðinlegir.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira