Innlent

Slökkviliðsstjórar þurfa að hafa sannfæringarkraft

Jóhann K. Jóhannsson skrifar
Slökkviliðið við æfingar
Slökkviliðið við æfingar Vísir/vilhelm

Nýkjörinn formaður Félags slökkviliðsstjóra segir slökkviliðsstjóra þurfa nýta allan sinn sannfæringarkraft til þess að gera sveitarstjórnarmönnum grein fyrir mikilvægi slökkviliða til þess að koma í veg fyrir niðurskurð.

Á ársþingi slökkviliðsstjóra ár hvert er farið yfir ýmis mál er snúa að rekstri slökkviliða í landinu, en nýjungar og breytingar á reglugerðum eru meðal annars teknar fyrir. Vegna mannabreytinga á slökkviliðasviði Mannvirkjastofunnar frá áramótum mun nám hlutastarfandi slökkviliðsmanna skerðast á þessu ári.

„Það er auðvitað sárt að missa það góða fólk sem þar var en það kemur alltaf maður í manns stað og forstjóri Mannvirkjastofnunnar er alla vega bjartsýnn að okkur takist að byggja upp gott spil með nýju fólki,“ segir Pétur Pétursson, formaður Félags slökkviliðsstjóra á Íslandi.

„Það kemur ákveðið hik í menntun hlutastarfandi slökkviliðsmanna út af þessum breytingum núna. Það tefjast námskeið sem átti að halda. Hvað varðar menntun atvinnuslökkviliðsmanna þá er því verkefni útvistað og slökkvilið höfuðborgarsvæðisins í samstarfi við fleiri slökkvilið hafa haldið utan um það og það er námskeið sem er í fullum gangi. Það er verið að mennta núna 40 atvinnuslökkviliðsmenn,“ segir Pétur.

Reglulega hefur komið upp umræða um að slökkviliðin á Íslandi, sem rekin eru af sveitarfélögunum séu fjársvelt í rekstri sínum.

„Víða finnst mönnum ekki nægilega vel gefið til sinna slökkviliða. Þau eru rekin á ábyrgð sveitarfélaganna af kröfu ríkisins og auðvitað er erfitt fyrir sveitarfélögin að forgangsraða hjá sér því það þarf að reka marga aðra þætti. Víðast finnst slökkviliðsstjórum þeir ekki fá það sem þeir þurfa. Þetta er mjög mikilvæg starfsemi; þetta eru forvarna- og öryggisstofnanir sveitarfélagana og það er auðvitað starf slökkvistjóranna að leiða sveitarstjórnarmönnum það fyrir sjónir hvað þeir þurfa,“ segir Pétur og til þess þurfi að hans mati sannfæringarkraft. „Sveitarstjórnarfólk verður einfaldlega að skilja mikilvægi þessa málaflokks.“

Pétur segir að verkefnum slökkviliða hafi fjölgað mikið með aukningu ferðamanna til landsins

„EKki bara á útkallssviði, vegna tíðari slysa í umferðinni, en það veldur talsvert miklu auka álagi á eldvarnareftirlit með þeim skoðunum sem þeim ber að framkvæma,“ og á Pétur þar við nýja reglugerð um heimagistingar.

Jón Viðar Matthíasson, slökkviliðsstjóri steig í gær til hliðar sem formaður félags Slökkviliðsstjóra og var Pétur kjörinn í formannssætið í gær eftir að Jón Viðar ákvað að gefa ekki kost á sér til áframhaldandi setu. Pétur segist taka við góðu búi en viðtalið við hann má heyra hér að ofan.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira